Ukraina nis përdorimin e bombave thërrmuese amerikane, “hakmerret” Rusia

Zëdhënësi i Shtëpisë së Bardhë për çështjet e sigurisë kombëtare, John Kirby konfirmoi se bombat thërrmuese amerikane po përdoren tashmë nga ushtria ukrainase.

Ndërkohë, OKB ka dënuar bombardimin që Rusia i ka bërë më herët porteve në Odesa dhe Detin e Zi.

Zëdhënës i Sekretarit të Përgjithshëm të OKB-së, Stéphane Dujarric, deklaroi: “Sekretari i përgjithshëm dënon ashpër sulmet ruse kundër infrastrukturës portuale në Odesa dhe porteve të tjera ukrainase në detin e Zi. Ato bien ndesh me zotimin e Federatës Ruse, që në bazë të memorandumit të mirëkuptimit me OKB-në thotë se Moska do të lehtësojë eksportin e ushqimeve, vajit të lulediellit dhe fertilizuesve nga portet ukrainase në detin e Zi”.

Gjatë natës së 20 korrikut, dy dronë të tipit “Shahed” vunë në shënjestër një kamp shëndetësor për fëmijët në lokalitetin Sami, duke dëmtuar dy godina. Një zjarr ra në njërën prej tyre për shkak të impaktit të dronit, por u shua nga skuadrat e shpëtimit. Sipas autoriteteve vendase, askush nuk mbeti i lënduar nga këto sulme.

Në fjalimin e tij të përnatshëm, presidenti Volodymyr Zelensky deklaroi se Rusia kishte përdorur thuajse 70 raketa dhe 90 dronë iranianë për të goditur Ukrainën në harkun kohor të 4 ditëve.

LEXONI GJITHASHTU:

• Putin-Polonisë: Çdo agresion kundër Bjellorusisë është sulm ndaj Rusisë
• “Putin po pret të marrë hak”- Shefi i CIA-s flet për rebelimin e Prigozhin