Ushtarët ukrainas përshkruajnë vijën e frontit: Është e tmerrshme

Ushtarët ukrainas që janë kthyer nga vija e frontit në rajonin e Donbasit, ku Rusia i ka dhënë jetë një ofensive të ashpër, e kanë cilësuar situatën atje si “ferri në Tokë”.

Agjencia “Associated Press” intervistoi disa luftëtarë, që përshkruan krahas kushteve në frontin lindor edhe gjendjen emocionale që po shkakton lufta.

 “Morali i djemve tanë është i lartë. Ata po e mundin dhe do ta mundin armikun derisa ta asgjësojnë komplet dhe të kthehemi në kufijtë e 2014-s, përfshirë Krimenë. Ishte shumë e vështirë për ne. Na është dashur të luftojmë në kushte çnjerëzore dhe kjo është e vështirë t’i shpjegohet dikujt që nuk e ka idenë. Atje po luftohet për jetë a vdekje. Detyra është të shkatërrojmë armikun, cilatdo qofshin pasojat,” – u shpreh Artem Ruban, ushtar i batalionit Svoboda.

Ndërkohë në Sloviansk, një magazinë peshku është kthyer në vatër për shpërndarjen e ushqimeve për njësitë ushtarake lokale, duke u dhënë atyre një pritje njerëzore, pavarësisht tmerreve të frontit.

Ndërsa trupat ruse, pasi morën nën kontroll Sievierodonjeckun, tani po përpiqen të rrethojnë qytetin e Liziçanskut.