VanHorn: Përzgjedhja e pasardhësit të Dumanit duhet të jetë e paanshme

Në Tiranë u zhvillua Konferenca Rajonale e OSBE-së, ku u diskutua lidhja mes trafikimit të drogës dhe krimeve të dhunshme. E Ngarkuara me Punë e SHBA-së, Nancy VanHorn, në fjalën e saj u ndal posaçërisht te mandati i kreut të SPAK-ut, Altin Dumani.

VanHorn theksoi se, ndonëse Dumani ka luajtur një rol të rëndësishëm në luftën kundër krimit dhe korrupsionit, ai do të zëvendësohet, pasi mandati i tij ka përfunduar sipas ligjit. Ajo nënvizoi se procesi i përzgjedhjes së pasardhësit të tij duhet të jetë i paanshëm, transparent dhe i lirë nga çdo ndikim i jashtëm.

“SPAK-u është aq efektiv sa pavarësia e tij për të ndjekur kriminelët, pavarësisht se me kë janë të lidhur. Edhe SPAK-u gjithashtu, sigurisht, i nënshtrohet ligjeve të Shqipërisë. Bazuar në ligj, Z. Dumani, sado efektiv, jashtëzakonisht efektiv që ka qenë, do të zëvendësohet sepse mandati i tij ka përfunduar. Dhe procesi i përzgjedhjes së pasardhësit të Z. Dumani duhet të jetë i paanshëm, transparent dhe i lirë nga ndikimet e jashtme.”-tha VanHorn

Diplomatja amerikane vlerësoi punën e deritanishme të SPAK-ut dhe theksoi rëndësinë e vazhdimësisë në këtë betejë përmes një drejtësie të pavarur dhe funksionale.

LEXONI GJITHASHTU:

• Dumani takon Kryeprokurorin e Malit të Zi: Synimi, lufta kundër krimit të organizuar
• Vizita e Dumanit në SHBA, SPAK zbardh takimet me zyrtarët e lartë amerikanë