Vdekja e 3-vjeçarit, flet gjyshi: E dërguam te Xhaxho për 4-5 dhëmbë, e mbajti 9 orë

Guri Spahiu, gjyshi i 3-vjeçarit që humbi jetën pas një ndërhyrjeje tek dentisti, rrëfeu në emisionin Review në Euronews Albania se djalin e kishin çuar tek mjeku Roland Xhaxho pasi kishte 4-5 dhëmbë me probleme.

Ai tregoi se mjeku u kishte thënë që ndërhyrja do të bëhej me anestezi në mënyrë që dentisti të punonte qetë, për të mos u shqetësuar nga lëvizjet e fëmijës, ndërsa u kishte dhënë garanci të plotë për procedurën.

“Duke parë se dhëmbët dhe dhëmballët ishin të nxira dhe kishte ndonjë dhimbe e çuam te mjeku për merak. Mendonim se kishte 3-4 dhëmbë dhe pjesën tjetër ta pastronte. Ramë dakord ditën e parë, ditën e dytë në 10 vajtëm atje. S’ka problem fare, tha mjeku, e mori në krahë, e përqafoi, i bëri analizën e gjakut. Mjeku kur e vizitoi tha do bëhet me narkozë se nuk duam të vuajë se është fëmijë i vogël, se dentistja duhet të punojë qetë, pa u shqetësuar nga lëvizjet e fëmijës. Na siguroi se përdoret në të gjitha klinikat evropiane, të jeni të qetë na tha. Pastaj i tha djalit firmos një deklaratë. Nuk e dinim që do bëhej ndërhyrje në 14 dhëmbë. Na tha maksimumin do jetë 2 orë ndërhyrja dhe nuk ka asnjë problem. Jua jap me garanci 300 për qind që s’ka asnjë problem, na tha. Deri ne 7.20 të darkës kemi ndenjur jashtë për të pritur djalin. Ka ndenjur brenda 9 orë”, tregoi gjyshi i 3-vjeçarit.