Vdiq në aksident, babai i 18-vjeçarit shqiptar: Djali s’po bënte video për TikTok

Babai i Lorenzo Pjertushit, 18 vjeçarit shqiptar që humbi jetën më 29 janar, është shprehur se djali i tij nuk ka qenë duke bërë video për ‘Tik-Tok’ në momentin që ka ndodhur aksidenti.

Sipas mediave të huaja, Agron Pjertushi ka thënë se Lorenzon e ka çuar vetë ai në ditëlindjen e kushëririt të tij por tha se nuk kishte pasur informacion mbi çfarë kishte ndodhur më vonë.

“Lorenzo ishte shumë i mirë, si shumë të rinj të moshës së tij. Atij i pëlqente të luante dhe të jetonte jetën. Atë mbrëmje të së shtunës e kisha çuar në një festë ditëlindjeje në Cimadolmo, me miqtë, e cila u mbajt rreth orës 22:00. Më pas nuk e di se çfarë ndodhi. Ndoshta më pas ka dalë me kushëririn e tretë, po nga Ormelle, një italian me origjinë shqiptare”- tha i ati i të riut që humbi jetën.

Prej datës 20 janar, i riu shqiptar ishte në gjendje të rëndë pas aksidentit tragjik. Ngjarja ndodhi teksa tentonte të rrinte në këmbë mbi makinën që drejtohej nga kushëriri i tij u rrëzua dhe u përplas nga i njëjti automjet.

Babai i Lorenzos tha se gjatë këtyre 8 ditëve, familjarët nuk kanë fjetur me shpresën se i riu do ta fitonte betejën për t’ju rikthyer jetës. Sipas tij, të rinjtë nuk kanë qenë duke bërë video në momentin kur ndodhi aksidentin duke sqaruar se në momentin kur policia u ka sekuestruar telefonat, atyre nuk u janë gjetur pamje të tilla.

“Ne nuk kemi fjetur për tetë ditë. Ndoshta gjithçka ka ndodhur si shaka, një lojë që përfundoi keq. Në makinë ishin pesë prej tyre, në një Ford. E drejton kushëriri i tretë i djalit tim. Ai kishte vetëm dy muaj që kishte marrë patentën e drejtimit, s’kishte shumë përvojë. Por ata nuk po bënin video apo foto për t’i postuar në TikTok, siç është thënë. Se si ka ndodhur e di vetëm policia, pasi i ka dëgjuar djemtë dhe ka konfiskuar të gjithë celularët, por nuk ka gjetur foto apo video. Djali im nuk ka bërë kurrë video për TikTok”, shtoi ai.

LEXONI GJITHASHTU:

• TikTok shkurton 60 vende pune në sektorin e reklamave dhe shitjeve
• Personazhi “arusha”: Fitoj 1000 euro në muaj nga TikTok, bleva lopën me “gifte”