Vëllai i Belerit flet për mediat greke: Pse Rama s’do ta humbasë Bashkinë e Himarës

Vëllai i kryebashkiakut të zgjedhur të Himarës, Fredi Belerit, Leonardi, ka zhvilluar një intervistë për median greke ERT.

Sipas mediave greke, ai tha gjatë intervistës se qeveria e kryeministrit Edi Rama nuk mund të pranojë të humbasë Bashkinë e Himarës, pasi sipas tij, mund të dalin në pah falsifikimet e bëra me pronat atje.

“Qeveria dhe zoti Rama personalisht nuk duan të humbin bashkinë e Himarës. Sepse do të dalin shumë. Vazhdojnë të bëjnë falsifikime me parcelat. Festa vazhdon”, tha Leonardo Beleri.

Duke folur në një konferencë të veçantë për qëndrimin e Jorgo Goros në detyrën e tij, ai tha se ai nuk bën asgjë pa lejen e Ramës.

“Zoti Goro nuk merr dot frymë nëse nuk merr leje nga zoti Rama”, tha vëllai i Belerit, duke përsëritur sugjerimin e të vëllait që nëse nuk është vetë kryetar bashkie që është zgjedhur, atëherë dikush të marrë postin, një i zgjedhur tjetër nga fraksioni i tij.

“Fatkeqësisht kemi një bashkëbisedues jo të besueshëm”, tha vëllai i Fredi Belerit, duke vlerësuar se Goro do të qëndrojë në detyrën e tij “për aq kohë sa të dojë zoti Rama”.

Në fakt, ai tha se kryeministri i Shqipërisë preferon të sakrifikojë të ardhmen e popullit të tij dhe që Shqipëria të mos hyjë në BE, sesa të humbasë bashkinë e Himarës.

Madje ai vlerësoi se veprimet e tij janë për faktin se “falsifikimet janë bërë në nivelin më të lartë dhe fatkeqësisht shumë njerëz duhet të mbrohen nën ombrellën e zotit Rama”.

Kujtojmë se Beleri ndodhet në burg me akuzën për blerje votash, për zgjedhjet lokale të 14 majit.

LEXONI GJITHASHTU:

• Rama për Himarën: Goro të ndërpresë mandatin. Vendimi i GJKKO për Belerin, i qartë
• Rama-Mitsotakis dhe “përplasjet” për Belerin, gazetari grek: Çfarë ndodhi në Bruksel