Venecia përkujton Marco Polo, bashkia publikon testamentin e tregtarit të famshëm

Në Venecia kanë nisur përkujtimet për 700-vjetorin e vdekjes së shtegtarit Marco Polo, i cili ndërroi jetë në vitin 1324.

Nisma të ndryshme janë organizuar nga Bashkia e Venecias, mes të cilave një ekspozim i testamentit të Polos, i ruajtur në bibliotekën kombëtare të Marçianas, në një kuti me ajër të kondicionuar.

Shkurtësia e testamentit sugjeron se tregtari i famshëm 73-vjeçar i përdori forcat e tij të fundit për ta diktuar atë.

Në dokument thuhet se Polo ia la pasurinë tre vajzave të tij Belela, Fantina dhe Moreta. Ai vinte nga një familje tregtare dhe në një familje të tillë, gratë luanin një rol thelbësor.

Sipas studiuesve, Marco e kishte kuptuar se në Venecia, ndërsa burrat ishin në det për muaj apo vite, ishin gratë ato që menaxhonin asetet e tyre.

“Ato kishin një rol aq të rëndësishëm social dhe ekonomik që nuk e gjeje në vende të tjera dhe shumë delegacione tregtarësh vizitonin bashkëshortet dhe nënat e tregtarëve”, deklaroi studiuesja Ticiana Plebani.

Marco Polo do të mbahet mend si eksploruesi që udhëtoi nëpër Azinë e Largët përmes së ashtuquajturës Rruga e Mëndafshit, mes viteve 1271 dhe 1295.

LEXONI GJITHASHTU:

• Pulëbardhat në aeroportin e Venecias, bëhen shkak për anulimin e disa fluturimeve
• Rrëfehet dëshmitari për aksidentin në Venecia: Bënin foto, nuk shpëtonin njerëzit