Verstappen i pakapshëm në Baku, Hamilton dhe Leclerc zhgënjejnë në provat zyrtare

Me provat zyrtare që tashmë kanë përfunduar, Formula 1 i afrohet kulmit të fundjavës në Baku, ku gara finale e Çmimit të Madh do të zhvillohet të dielën në orën 13:00 me orën shqiptare. Max Verstappen i Red Bull ishte më i shpejti në kualifikuese, duke siguruar ‘pole position’ përpara Carlos Sainz dhe Liam Lawson, ndërsa Lewis Hamilton nuk arriti të shkëlqejë, duke u eliminuar që në xhiron e dytë. Charles Leclerc, nga ana tjetër, do ta nisë vetëm nga vendi i dhjetë.

Ky është ‘pole position’-i i gjashtë për sezonin për kampionin në fuqi, që konfirmon formën e mirë në një pistë të vështirë si ajo urbane e Bakusë. Lando Norris me McLaren u rendit i shtati, në një ditë që nuk shkoi sipas pritshmërive për skuderinë britanike, e cila nuk arriti të përshtatet me rrugët e ngushta dhe kthesat teknike të këtij konfigurimi.

Në klasifikimin e përgjithshëm të pilotëve, kryeson Oscar Piastri me 324 pikë, ndjekur nga shoku i skuadrës Lando Norris me 293. Verstappen mban vendin e tretë me 230 pikë. Ndërkohë, tek konstruktorët, McLaren vijon dominimin me 617 pikë, shumë përpara Ferrarit që renditet i dyti me 280.

E diela pritet të sjellë emocione të forta në rrugët e kryeqytetit azer, ku gara shpesh ka prodhuar surpriza dhe skena spektakolare.