Vetëm dy kryetarë të komunave në Veri brenda ndërtesave

Kryetari Leposaviçit, Lulzim Hetemi, dhe ai i Mitrovicës së Veriut, Erden Atiç, gjenden në objektet e komunave përkatëse, bënë të ditur burimet e Radios Evropa e Lirë.

Siç merr vesh REL-i, kryetari i Leposaviçit ka mbetur brenda objektit të komunës që nga dita e djeshme, për “arsye sigurie”.

Me gjithë përpjekjet, REL-i nuk arriti të bjerë në kontakt me Hetemin.

Ndërkaq, kryetari i Zveçanit, Ilir Peci, konfirmoi për Radion Evropa e Lirë se është duke punuar nga Zyra për Komunitete në fshatin Lipë të kësaj komune, e jo nga objekti komunal.

“Këtu sot e kemi filluar punën… Tani, le ta shohim”, tha shkurtimisht ai të martën.

Për të dytën ditë me radhë, serbët në Zveçan, Leposaviç dhe Zubin Potok po protestojnë, duke kundërshtuar kryetarët e rinj shqiptarë. Ata po kërkojnë po ashtu tërheqjen e njësive speciale të Policisë së Kosovës nga veriu i shtetit.

LEXONI GJITHASHTU:

• “Armët po fshihen nëpër kisha”, deputetja britanike dënon sulmet e serbëve në Veri
• Dhuna ndaj KFOR-it në Veri, zyrtari i rëndësishëm i BE-së mbërrin në Kosovë