Veteranë të UÇK-së homazhe në Prekaz, Gucati uron festat e nëntorit

Veteranë dhe përfaqësues të Ushtrisë Çlirimtare të Kosovës kanë zhvilluar këtë të premte homazhe në Kompleksin Memorial “Adem Jashari” në Prekaz. I pranishëm ishte edhe kryetari i OVL-UÇK-së, Hysni Gucati i cili foli para mediave.

Ai u shpreh se këto festa të nëntorit janë të mangëta pa krerët e Ushtrisë Çlirimtare të Kosovës të cilët mbahen të arrestuar në Hagë. Gucati uroi festën e Pavarësisë së Shqipërisë teksa theksoi se pret që vitin e ardhshëm të festojë me krerët e UÇK-së.

“Ju urojmë festat e nëntorit, katër festat të cilat janë në këtë muaj. Festa e vitit 1944 ngritja e flamurit në Krujë nga Skënderbeu, shpallja e Pavarësisë së Shqipërisë në vitin 1912, ditëlindja e komandantit legjendar, Adem Jashari më 1955 dhe dalja në skenë e Ushtrisë Çlirimtare të Kosovës. Ne edhe një herë ju urojmë të gjithë qytetarëve të Kosovës, familjeve të dëshmorëve, invalidëve dhe veteranëve këto festa të nëntorit.

Këto festa janë të mangëta për arsye se ne i kemi krerët e UÇK-së, padrejtësisht duke u mbajtur atje nga një gjykatë, por ja që na ndodhi kjo dhe ne shpresojmë dhe besojmë se vitin e ardhshëm do t’i presim këto festa bashkërisht me ta”, tha Gucati.

LEXONI GJITHASHTU:

• Operacioni/ Inspektorë të AZHBR dhe veterinerë në hetim për falsifikim dokumentesh
• Europol operacion në 26 shtete para Krishtlindjeve, sekuestron lodra të rrezikshme