VIDEO/ Gjenden kokainë, kanabis dhe armë në një magazinë në Tiranë, 5 të arrestuar

Policia e Tiranës ka zbuluar një magazinë ku fshihej lëndë narkotike dhe përgatitej për shitje në doza.

Gjatë aksionit të koduar “Warehouse” janë sekuestruar 9 kilogramë Cannabis Sativa, sasi kokaine, 2 armë zjarri, 2 armë të ftohta, 2 automjete, 6 celularë dhe sende të tjera të kundërligjshme.

Në pranga kanë rënë 5 anëtarë të grupit që kryenin këto veprimtari kriminale, të gjithë banues në Tiranë, konkretisht shtetasit me iniciale: Xh. Z., 25 vjeç; R. K., 21 vjeç; E. Gj., 37 vjeç; A. C., 22 vjeç; dhe A. K., 22 vjeçe.

Bazuar në informacionet e siguruara në rrugë policore, është ndërmarrë një kontroll në rrugën “Myslym Keta”, në magazinën e shtetasit R. K., e cila kishte aktivitet prodhimin e paletave të drurit. Në magazinë u gjet një valixhe me 9 kg lëndë të dyshuar narkotike kanabis dhe një armë zjarri pistoletë.

Nga hetimet dyshohet se sasia e lëndës narkotike është transportuar nga Sukthi në Tiranë nga shtetasi Xh. Z., në bashkëpunim me shtetasen A. K.

Gjatë ndërhyrjes së Policisë, në magazinë u kapën edhe shtetasit A. C dhe E. Gj.  Gjatë kontrollit fizik, shtetasit E. Gj. iu gjet një sasi lëndë narkotike kokainë.

Në vijim të veprimeve procedurale, gjatë kontrollit në banesën e shtetasit Xh. Z. u gjetën një armë zjarri pistoletë dhe dy armë të ftohta.

Hetimet vijojnë për identifikimin e personave të tjerë të implikuar në këtë veprimtari kriminale.

Materialet procedurale i janë kaluar Prokurorisë për veprime të mëtejshme.

VIDEO/ Gjenden kokainë, kanabis dhe armë në një magazinë në Tiranë, 5 të arrestuar