VIDEO/ I morën 40 mijë € një 55-vjeçari te rrethrrotullimi i Rinasit, në pranga 4 persona

Katër persona kanë rënë në pranga, pasi dyshohet se përmes mashtrimit i kanë marrë një shtetasi shumën prej 40 mijë eurosh te rrethrrotullimi i Rinasit.

Përmes një njoftimi zyrtar, policia bën me dije se, pas denoncimit të një 55-vjeçari, u bë i mundur identifikimi dhe arrestimi i shtetasve Krenar Toromeni, Ilia Gjini, Artur Lecini dhe Elton Rrushi, si dhe shpallja në kërkim e shtetasve E.B. dhe L.M.

Toromeni, Gjini, Lecini dhe L.M., në bashkëpunim me njëri-tjetrin, i kanë marrë shumën prej 40.000 eurosh 55-vjeçarit, përmes mashtrimit, duke iu prezantuar si të njohur të tij.

Ndërkohë, gjatë kontrollit në banesën e Artur Lecinit, ku u gjet edhe Elton Rrushi, u zbulua një ambient i përshtatur me pajisje elektrike për kultivimin e bimëve narkotike.

Në kuadër të operacionit, shërbimet e Policisë gjetën dhe sekuestruan dhjetëra bimë cannabis, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi kokaine dhe cannabisi, katër celularë dhe një automjet tip “Audi Q5”.

Njoftimi i Policisë

“Sektori për Hetimin e Krimit Ekonomik dhe Financiar, në bashkëpunim me Sektorin e Forcës së Posaçme Operacionale në DVP Tiranë dhe Komisariatet e Policisë të Kavajës dhe Divjakës, pas administrimit të kallëzimit të një 55-vjeçari, i cili pretendonte se ishte mashtruar nga disa shtetas të panjohur, organizoi dhe finalizoi operacionin policor të koduar “Skema”.

Në kuadër të këtij operacioni u arrestuan shtetasit:

K. T., 36 vjeç, banues në Divjakë

I. Gj., 24 vjeç, banues në Divjakë

A. L., 39 vjeç, banues në Kavajë

E. Rr., 38 vjeç, banues në Kavajë

Si dhe u shpallën në kërkim shtetasit:

E. B., 34 vjeç

L. M., 35 vjeç

Shtetasit K. T., I. Gj., A. L., E. B. dhe L. M., në bashkëpunim me njëri-tjetrin, përmes mashtrimit dhe duke u prezantuar si të njohur të viktimës, i kanë marrë shumën prej 40.000 eurosh 55-vjeçarit.

Gjatë kontrollit në banesën e shtetasit A. L., ku u gjet edhe shtetasi E. Rr., u zbulua një ambient i përshtatur me pajisje elektrike për kultivimin e bimëve narkotike.

Sekuestrohen dhjetëra bimë cannabis, pajisje (llamba dhe ventilatorë) që shërbenin për kultivimin e tyre në ambiente të mbyllura, sasi kokaine dhe cannabisi, 4 celularë dhe 1 automjet tip “Audi Q5”, me të cilin 5 shtetasit janë larguar pasi morën shumën e eurove.

Punohet për kapjen e dy shtetasve të shpallur në kërkim dhe për dokumentimin e plotë të rastit.

Materialet procedurale iu referuan Prokurorisë së Tiranës për veprime të mëtejshme”, njofton policia.