VIDEO/ Të bllokuar nga bora në Qafë-Murrizë, Policia: Evakuam 50 pasagjerë

Policia raporton se ka evakuar të gjithë pasagjerët që ndodheshin në automjetet e bllokuara për shkak të reshjeve të dëborës në Qafë-Murrizë të Dibrës.

Përmes një njoftimi, Policia bën të ditur se janë evakuar 50 pasagjerë që ndodheshin në automjetet e tyre, duke i nxjerrë nga zona ku kishin mbetur të bllokuara.

Po ashtu Policia paralajmëron shoferët që ndodhen në makina në këtë aks të bllokuar rrugor, që për pak minuta mund të fillojë lëvizja e automjeteve, pas pastrimit të aksit.

Njoftimi i Policisë:

Qafë Murrizë/Policia evakuoi të gjithë pasagjerët që ndodheshin në automjetet e bllokuara për shkak të reshjeve të dendura të dëborës.

Shërbimet e Policisë Rrugore dhe të Patrullave të Përgjithshme, nëpërmjet automjeteve të kalueshmërisë së lartë, bënë të mundur evakuimin e 50 pasagjerëve që ndodheshin në automjete në bypass Qafë Murrizë, duke i nxjerrë nga zona ku kishin mbetur të bllokuar dhe po i transportojnë në destinacionet e tyre, në Klos, Bulqizë dhe në Peshkopi.

Ndërkohë, borëpastrueset po punojnë intensivisht për pastrimin e rrugës, për të bërë të mundur që dhe automjetet të vijojnë lëvizjen. Drejtuesit e automjeteve të qëndrojnë në makina pasi po punohet intensivisht që për pak minuta të fillojë lëvizja e automjeteve.

Shërbimet e Policisë, pavarësisht kushteve të vështira të motit, ndodhen në krye të detyrës, për t’iu dhënë ndihmë të gjithë përdoruesve të rrugës, në rast nevoje, dhe apelojnë edhe një herë për shmangie të qarkullimit në rrugën e Arbrit.

Gjithashtu, Policia Rrugore apelon që dejtuesit e automjeteve të moderojnë shpejtësinë, të ruajnë distancën dhe në rast nevoje të telefonojnë në numrin pa pagesë 112.