VIDEO/ Të vjedhura në SHBA, Itali, Britani dhe Gjermani, sekuestrohen 4 makina luksoze

Policia e Tiranës ka sekuestruar katër automjete luksoze dhe ka proceduar penalisht dy shtetas, ndërsa dy të tjerë i ka shapllur në kërkim, në kuadër të operacionit “Stolen Line”.

Sipas policisë, është nisur procedimi penal ndaj shtetasit S. C., i cili dyshohet se ka trafikuar një automjet tip Jeep, me qëllim shitjen në Shqipëri, i cili rezulton i vjedhur në Itali.

Po ashtu, procedim penal është nisur edhe ndaj shtetasit E. Ç., i cili dyshohet se ka trafikuar një automjet tip Range Rover, i cili rezulton i vjedhur në Shtetet e Bashkuara të Amerikës.

Ndërkohë, janë shpallur në kërkim shtetasit E. J. dhe R. R. I pari dyshohet se ka trafikuar një automjet tip BMW, i vjedhur në Gjermani, ndërsa i dyti një automjet tip Seat Cupra, i vjedhur në Itali, të dy me qëllim shitjen në Shqipëri.

Katër automjetet e sekuestruara, me një vlerë totale rreth 200 mijë euro, janë marrë në cilësinë e provës materiale.

Për të gjitha këto raste dhe personat e dyshuar, specialistët e Seksionit për Hetimin e Trafiqeve të Paligjshme në Drejtorinë Vendore të Policisë Tiranë, kanë referuar materialet në Prokurori.