“Videoja e dhunës nuk ka dalë nga ne” – Policia i përgjigjet Oborrit Mbretëror

Policia e shtetit i është përgjigjur Oborrit Mbretëror lidhur me publikimin e një videoje që tregonte përplasjen e Princit Leka me ish-bashkëshorten e tij Elia Zaharia në rezidencën mbretërore.

Në një njoftim për media policia bën me dije se “në lidhje me rastin janë kryer të gjitha veprimet e nevojshme procedurale, janë sekuestruar pamjet filmike, të cilat i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Tiranë. Po kështu deklarojmë që kjo video nuk ka dalë nga strukturat e Policisë”.

Në një të deklaratë të Oborrit Mbretëror shprehet indinjata për shpërndarjen e këtyre pamjeve në media dhe rrjetet sociale dhe kërkohet ndërhyrja e institucioneve përkatëse për fshirjen e këtyre imazheve nga rrjetet sociale dhe nga mediat.

“Videot janë dorëzuar vetëm në komisariatin e policisë nga Princ Leka ll Zogu, si provë materiale për dhunën e ushtruar ndaj tij, por pavarësisht se janë konsideruar si një sekret, këto materiale, së bashku me deklaratën, qarkulluan gjerësisht në rrjetet sociale dhe në medie duke përcjellë imazhe të pakëndshme dhe me përmbajtje dhune.

Oborri Mbretëror shpreh thellësisht zhgënjimin nga institucionet ligjzbatuese te të cilat dyshojmë se kanë cenuar të drejtën e anonimitetit, duke shpërndarë videot te të tretë”, thuhej në deklaratën e Oborrit.

Princ Leka ka bërë sot një kallëzim në Komisariatin nr.1 në Tiranë ndaj ish-bashkëshortes Elia Zaharia dhe babait të saj Gjergj Zaharia. Princ Leka ka kërkuar urdhër-mbrojtje duke pretenduar se babai ish-bashkëshortes e ka dhunuar.

LEXONI GJITHASHTU:

• Konflikt fizik|Princ Leka denoncon ish-bashkëshorten dhe të atin e saj: Dua mbrojtje
• Denoncimi i Princ Lekës për dhunë nga ish-bashkëshortja, reagon Oborri Mbretëror