Vjosa Osmani dhe Albin Kurti urojnë 112-vjetorin e Pavarësisë së Shqipërisë

Presidentja e Kosovës, Vjosa Osmani dhe kryeministri Albin Kurti kanë uruar 112-vjetorinë e Pavarësisë së Shqipërisë. Osmani shkruan se kjo ditë është simbol i betejave dhe triumfeve por dhe përkujtim i sakrificave për të qenë të lirë ndërsa Kurti thotë se vepra historike e familjes Jashari pasqyron qëndresën dhe luftën e popullit për liri, pavarësi dhe bashkim.

Urimi i Presidentes Osmani për 28 Nëntor

Më 28 nëntor, nderojmë historinë, flamurin dhe identitetin kombëtar, duke riafirmuar përkushtimin tonë për fuqizimin e shteteve tona.

28 Nëntori nuk është vetëm simbol i betejave dhe triumfeve tona, por edhe kujtim i sakrificave tona për të qenë të lirë, në paqe dhe krenarë.

28 Nëntori është simbiozë e tri momenteve historike që e lartësojnë kombin tonë: ngritja e flamurit në Vlorë dhe shpallja e pavarësisë së Shqipërisë, dalja publike e UÇK-së dhe ditëlindja e komandantit legjendar Adem Jashari.

Të bashkuar në zemër e shpirt, le ta festojmë këtë ditë me krenari!

Urimi i kryeministrit Albin Kurti për 28 Nëntor

Ky 28 Nëntor na gjen me projektin e Kompleksit Memorial “Adem Jashari” në Prekaz. Në këtë vend të shenjtë që ruan gjurmët e veprës heroike të Familjes Jashari, ne kthehemi e rikthehemi që të kujtojmë çmimin e lirisë të cilën e gëzojmë sot.

Nuk do të kursejmë asgjë për të ndërtuar një kompleks memorial të rëndësishëm ndërkombëtarisht, i cili do të pasqyrojë dinjitetshëm dhe me një nivel të lartë artistik, qëndresën dhe luftën e popullit për liri, pavarësi dhe bashkim, ashtu siç e meriton figura e Adem Jasharit dhe e Familjes Jashari.

Gëzuar 28 Nëntori!

LEXONI GJITHASHTU:

• Ambasada e SHBA uron 112-vjetorin e Pavarësisë, këndohet në seli Himni Kombëtar
• Politika uron Ditën e Pavarësisë: Rama shpërndan videon, Meta mesazh nga burgu