Vllaznia mbyll përgatitjet, Kastrati: Flamurtari ka cilësi, por marrim 3 pikët

Skuadra më në formë e kampionatit shqiptar, Vllaznia, ka mbyllur përgatitjet për ndeshjen e fundit të fazës së parë të Superligës Shqiptare, me objektiv të qartë marrjen e 3 pikëve.

Kundërshtari i javës së nëntë është Flamurtari, skuadër që renditet e fundit në klasifikim me vetëm 2 pikë.

Futbollisti Lirim Kastrati ishte përzgjedhur për konferencën për shtyp, ku analizoi duelin.

“Flamurtari ka cilësi dhe nuk meriton vetëm 2 pikë që kanë. Ne jemi të motivuar, jo vetëm për Flamurtarin, por për çdo ndeshje. E vlerësojmë si ekip, por synimi ynë janë 3 pikët”, tha Kastrati.

Ai foli edhe për eksperiencën e tij te Vllaznia:

“Nuk është kjo forma më e mirë, duhet të jap maksimumin në çdo ndeshje. Çdo ndeshje më ndihmon. Trajneri beson shumë te unë dhe jam i lumtur që kam ardhur te Vllaznia. Do të ketë ndeshje më të mira se ajo me Tiranën”, shtoi ai.

Vllaznia kryeson kampionatin shqiptar me 19 pikë, tre më shumë se vendi i dytë që mbahet nga Egnatia, ndërsa Flamurtari ka ecurinë më negative në ligë, me vetëm 2 pikë në 8 javë të luajtura.

LEXONI GJITHASHTU:

• Teuta dhe Vllaznia ndajnë pikët në Durrës, Egnatia triumfon ndaj Tiranës
• Vllaznia kualifikohet në raundin e dytë të UEFA Women’s Europa Cup