VMRO-DPMNE shpall fitoren në shumicën e komunave në RMV

Partia opozitare VMRO-DPMNE ka shpallur fitoren në shumicën e komunave në raundin e dytë për zgjedhjet lokale që u mbajt të dielën në Maqedoninë e Veriut.

Sipas të dhënave nga selia e kësaj partie, Shkupi është fituar nga kandidatja e pavarur, Danella Arsovska, që kishte mbështetjen e VMRO DPMNE-së dhe të opozitës shqiptare.

“Pjesëmarrja masive ishte përgjigja ndaj fushatës së zezë të qeverisë ditën e diel. Një ditë e trishtë për qeverinë jodemokratike të (kryeministrit, Zoran) Zaev, një ditë e fortë për vullnetin e popullit që vendosi për ndryshim dhe një të ardhme të re”, tha Marija Miteva nga VMRO-DPMNE-ja.

Komisioni Shtetëror i Zgjedhjeve (KSHZ) e ka vlerësuar procesin zgjedhor për balotazhin në Maqedoninë e Veriut demokratik dhe të qetë.

“Vlerësoj se të dielën kishim proces zgjedhor demokratik, të qetë dhe disa probleme të vogla të izoluara që nuk ndikuan në mbarëvajtjen e procesit zgjedhor. Pra, zgjedhjet konsideroj se ishin të suksesshme”, ka deklaruar kryetari i KSHZ-së, Alekandar Dashtevski.