Një 41-vjeçar ka rënë në prangat e policisë së Tiranës, pasi dyshohet se ka vjedhur një shumë parash dhe steka me cigare, në një market në rrugën “Sitki Çiço” në kryeqytet.
Në cilësinë e provës materiale u sekuestruan stekat e vjedhura, një shumë parash si dhe veshje të cilat autori i dyshuar i ka përdorur gjatë kryerjes së vjedhjes.
Policia bën me dije se 41-vjeçari ka qenë i dënuar për të njëjtën vepër penale dhe në Francë.
Materialet në ngarkim të tij i kaluan Prokurorisë së tiranës për veprime të mëtejshme.
“Specialistët për Hetimin e Krimeve të Komisariatit të Policisë Nr. 4 në vijim të punës për goditjen e veprimtarive kriminale në fushën e vjedhjes së pronës dhe për vënien përpara përgjegjësisë penale, të shtetasve që i kryejnë ato, kanë organizuar dhe finalizuar operacionin policor të koduar “Rikthimi”.
Si rezultat i tij u arrestua shtetasi S. H., 41 vjeç, banues në Tiranë, për veprën penale “Vjedhja”, parashikuar nga neni 134 i Kodit Penal, i dënuar më parë për të njejtën veprimtari kriminale në Francë.
41-vjeçari dyshohet se ka vjedhur një shumë parash dhe steka me cigare, në një market në rrugën “Sitki Çiço””, thuhet në njoftimin e policisë.
LEXONI GJITHASHTU:
- I dyshuar për disa vjedhje, policia e Kavajës kap hajdutin shëtitës
- Aksident me vdekje në aksin Plepa-Kavajë, makina përplas këmbësorin dhe largohet
