Gazetari Vullnet Krasniqi ka treguar detaje të reja lidhur me vrasjen e 35- vjeçares Hamide Magashi nga ish-bashkëshorti Sokol Halili para QKUK, në Prishtinë.
Në një intervistë për “Good Morning Albanians” në Euronews Albania, ai tha se në vendin që ka ndodhur krimi kanë qenë dy ose tre patrulla policie.
“Në çdo hyrje të secilit spital në Prishtinë ka vende që qëndron policia, pra në pjesën kur ka ndodhur krimi kanë qenë dy ose tre patrulla policore. Si është e mundur që një person i armatosur hyn në klinikën e gjinekologjisë, e tejkalon çdo patrullë, e tejkalon sigurimin? Ministria paguan qindra mijëra euro për sigurimin. Ai ka qenë një person i zakonshëm që jetonte në Gjermani”- tha ai.
Më tej, ai theksoi se dyshohet që Halili, pasi ka kryer vrasjen, është larguar drejt Gjermanisë.
“Dyshimet janë që Halili sapo ka bërë krimin, ka ikur në Gjermani. Ai ka hyrë e ka vrarë dhe ka ikur pa asnjë pengesë. Ai e ka vrarë para hyrjes së klinikës. Ajo që dihet është se nëna e autorit e ka vizituar para dy ditësh viktimën dhe i kanë kërkuar që të kthehet në shtëpi me arsyetimin e përgjithshëm për shkak të fëmijëve. Ndërkohë viktima ka thënë se nuk do të kthehet më në atë shtëpi”- shtoi gazetari.
Sipas tij, dëshmitarët kanë deklaruar se 31-vjeçari e ka planifikuar këtë në mënyrë perfekte. Ai ka pritur deri sa ka dalë gruaja dhe e ka vrarë. Pasi e ka kryer vrasjen, ka ikur shumë i qetë.
LEXONI GJITHASHTU:
- Risia në WhatsApp, tashmë mund t’i dërgoni mesazhe vetes
- 90 % e të infektuarve e marrin HIV përmes rrugëve seksuale
