Vrasja e gjyqtarit Kalaja, Berisha: Dëshmi e kontrollit të rendit nga krimi

Kreu i Partisë Demokratike, Sali Berisha përmes një postimi në “Facebook” ka reguar në lidhje me vrasjen e regjistruar pasditen e sotme të gjyqtarit Astrit Kalaja. Berisha ka shprehur ngushëllimet e tij për familjen e viktimës si dhe ka dënuar ngjarjen të cilën e ka cilësuar një akt të shëmtuar kriminal.

Ai më tej shkruan se kjo ngjarje është dëshmi se në vendin tonë ka kontroll krimi dhe pasiguria. Kryedemokrati ka kërkuar dënimin e autorit dhe porositësit të kësaj ngjarjeje  tragjike që i mori jetën një gjyqtari në krye të detyrës.

“Ekzekutohet me armë zjarri gjyqtari i Apelit Astrit Kalaja. Mediat njoftojnë se një person i armatosur ka qëlluar me armë zjarri sallen e gjyqit, në detyrë, gjyqtarin e Apelit Astrit Kalaja, i cili humbi jetën nga plagët brenda pak kohe.

Duke i shprehur ngushëllimet më të ndjera familjes, miqve dhe të afërmve të gjyqtarit të ndjerë Kalaja, dënoj me forcën më të madhe aktin e shëmtuar dhe kriminal ndaj gjyqtarit në sallen e gjyqit, dëshmi e kontrollit të rendit nga krimi dhe pasigurisë së madhe që ekziston sot në vend. Kërkoj dënimin më të rreptë ligjor për ekzekutorin dhe porositësit e këtij krimi shumë të rëndë,” -shkruan Berisha.

Gjyqtari Astrit Kalaja pasditen e sotme u plagos për vdekje me armë gjatë një seance në Gjykatën e Apelit në Tiranë. Nga të shtënat u plagosën edhe dy persona, babë e bir të cilët janë jashtë rrezikut për jetën. Kalaja nuk arriti t’iu mbijetonte plagëve të marra dhe ka ndërruar jetë rrugës për në spital.

Autori i ngjarjes është arrestuar dhe ka pranuar fajësinë. Ai nuk ka tentuar të largohet nga vendi i ngjarjes dhe gjatë dëshmisë nuk ka shfaqur pendesë. Ai është shprehur se ishte i detyruar të kryente aktin sepse po humbiste gjyqin.