Vuçiç e konfirmon: Pas 2-3 ditësh do jem në Bruksel, do takohem me Kurtin

Presidenti i Serbisë, Aleksandër Vuçiç, konfirmoi këtë të martë se pas dy-tre ditësh do të shkojë në Bruksel për bisedime me kryeministrin e Kosovës Albin Kurti.

Gjatë një vizite në Spitalin e Përgjithshëm në Leskovc, Vuçiç dha lajmin e takimit dhe preferoi të mos jepte detaje të mëtejshme.

Ai shtoi se do të shkojë në Bruksel të mbrojë Serbinë nga sanksionet, në kuadër të agjendës që kanë rënë dakord me ndërkombëtarët.

“Pas kësaj do të kemi më shumë informacione. Detyra jonë është ta mbrojmë Serbinë nga të gjitha masat e mundshme dhe kolapsi i interesave shtetërore dhe kombëtare dhe besoj se do t’ia dalim”, tha Vuçiç.

Takimi mes Kurtit dhe Vuçiç, në Bruksel pritet të jetë i pari pas sulmit në Basnjkë ku u vra reshteri i policisë së Kosovës Afrim Bunjaku.

Gjatë shkëmbimit të zjarrit mes policisë së Kosovës dhe forcave paramilitare të armatosura rëndë, u vranë tre prej tyre, ndërkohë që pjesa tjetër e grupit mundi të largohej nga kufiri i gjelbër për në Serbi.

Në krye të sulmit ishte ish-nënkryetari i Listës Serbe Milan Radoiçiç, i cili kërkohet të ekstradohet dhe gjykohet në Kosovë nga autoritetet ligjzbatuese në Prishtinë.

LEXONI GJITHASHTU:

• Kurti nga Greqia: Të bashkohemi kundër elementeve destabilizuese
• “Sulmin në Banjskë e organizoi klani i Novi Sadit”, Kurti: Zyrtari serb që e drejton
• Ministri serb i Mbrojtjes reagon pas deklarateve të Kurtit: Gënjeshtra flagrante…