Vuçiç: Shqiptarët po përpiqen të marrin fshehurazi veriun e Kosovës

Presidenti serb, Aleksandar Vuçiç deklaroi se autoritetet në Serbi kanë informacione se shqiptarët, heshturazi dhe fshehurazi po bëjnë përpjekje të marrin veriun e Kosovës, pasi policia filloi patrullimin në kufirin mes dy vendeve dhe në hapësirën e liqenit të Ujmanit.

Vuçiç tha se për këtë, shqiptarët kanë mbështetjen e fuqive më të mëdha evropiane dhe të vendeve të QUINT-it, shkruan Euronews Serbia.

“Sot ministri i tyre i Brendshëm njoftoi se kontrollojnë plotësisht liqenin e Ujmanit. me Marrëveshjen e Brukselit, policia në veri duhet t’i takojë Drejtorisë së Veriut, gjegjësisht serbët duhet të jenë aty”, u shpreh Vuçiç.

Sipas tij, Brukseli nuk reagon ndaj thirrjeve për të ndikuar në veprimet e Prishtinës dhe paralajmëroi zyrtarët e BE-së dhe të Kosovës se Serbia nuk do ta lejojë më diçka të tillë.

Këtë të enjte, Policia e Kosovës ka filluar patrullimin ujor në kufi me Serbinë si dhe të gjithë hapësirën e Liqenit të Ujmanit, për herë të parë që nga paslufta.

Lajmi u bë i ditur nga ministri i Punëve të Brendshme në Kosovë, Xhelal Sveçla përmes një njoftimi në rrjetet sociale.

Sveçla deklaroi se tashmë kufiri shtetëror është i plotë, teksa vlerësoi punën e Policisë së Kosovës.

LEXONI GJITHASHTU

• Policia e Kosovës fillon patrullimin ujor në kufi me Serbinë
• Vuçiç mbledh Këshillin e Sigurisë Kombëtare, diskutime për Kosovën
• Erdogan në Beograd: Turqia e gatshme të ndihmojë Kosovën dhe Serbinë në dialog