Vuçiç thotë se i druhet bisedimeve me Sholcin

Presidenti i Serbisë, Aleksandar Vuçiç, do të udhëtojë në Berlin, ku pritet të takohet me kancelarin gjerman, Olaf Sholc.

Duke folur gjatë një vizite në Greqi, Vuçiç tha se i druhet bisedimeve me Sholcin dhe se nuk pret që ato “të jenë të lehta”.

Sholc ka ftuar Vuçiçin dhe kryeministrin e Kosovës, Albin Kurti, në bisedime të ndara, më 4 maj.

Atyre do t’iu bashkëngjitet edhe përfaqësuesi i posaçëm i Bashkimit Evropian në dialogun midis Kosovës dhe Serbisë, Mirosllav Lajçak.

Lajçak pritet të zhvillojë edhe një takim të përbashkët me Kurtin dhe Vuçiçin.

Nëse realizohet, ky do të jetë takimi i parë Kurti-Vuçiç që nga korriku i vitit të kaluar, kur palët janë takuar në Bruksel, në kuadër të dialogut për normalizimin e marrëdhënieve.

Gjatë qëndrimit në Greqi, Vuçiç u pyet edhe për sanksionet kundër Rusisë, për shkak të pushtimit të Ukrainës, por nuk tha se çfarë qëndrimi do të marrë Serbia për këtë çështje.

Serbia, aktualisht, është vendi i vetëm në Ballkanin Perëndimor që nuk u është bashkuar sanksioneve të Perëndimit kundër Rusisë.

LEXONI GJITHASHTU:

• Kurti-Vuçiç në Gjermani, takime të ndara me kancelarin Scholz