Zbardhen 9 vjedhje në Tiranë, sekuestrohen drogë dhe municione, në pranga 2 persona

Policia e Tiranës ka finalizuar dy operacione brenda 24 orëve, në kuadër të hetimeve për goditjen e veprimtarisë kriminale në fushën e vjedhjes së pronës dhe pasurisë.

Policia tha se operacionet e koduara “Friday” dhe “Bashkëpunimi” kanë çuar në zbardhjen dhe dokumentimin e nëntë rasteve të vjedhjes, arrestimin e dy shtetasve dhe shpalljen në kërkim të një personi tjetër.

Në kuadër të operacionit “Friday” është arrestuar shtetasi A. Ll., 42 vjeç, i dyshuar si autor për vjedhjen e pesë biçikletave si dhe për hyrjen në dy subjekte tregtare, nga ku ka marrë sende me vlerë.

Ndërkohë, në kuadër të operacionit të dytë, të koduar “Bashkëpunimi”, është arrestuar shtetasi E. D., 29 vjeç, si dhe është shpallur në kërkim shtetasi O. Sh., 28 vjeç.

“Nga hetimet rezulton se më datë 14 shtator 2025, E. D. ka vjedhur një shumë parash në një subjekt tregtar në pronësi të shtetasit F. Q., ndërsa më 17 shtator, në bashkëpunim me 28-vjeçarin në kërkim, kanë hyrë në ambientet e biznesit të shtetasit A. F., nga ku kanë marrë tre laptopë.

Gjatë kontrollit fizik ndaj shtetasit E.D, shërbimet e Policisë kanë gjetur dhe sekuestruar një palë doreza të zeza të përdorura për të humbur gjurmët gjatë vjedhjeve, një sasi lënde narkotike, kokainë, si dhe municion luftarak.

Policia njofton se hetimet vijojnë për dokumentimin e vjedhjeve të tjera që dyshohet se janë kryer nga të njëjtët shtetas”, thuhet në njoftimin e policisë.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme ligjore.

LEXONI GJITHASHTU:

• Rrëmbimi, vrasja dhe zhdukja e Klevis Lleshit, jepet masa për 2 autorët e dyshuar
• Goditet rrjeti i prostitucionit në Durrës, arrestohen 3 kineze dhe organizatori