Zbardhet kërkesa e Metës për lirimin nga qelia, gjyqtari që do ta shqyrtojë

Gjykata e Posaçme kundër Korrupsionit dhe Krimit të Organizuar ka caktuar datën 20 qershor për zhvillimin e seancës gjyqësore në lidhje me kërkesën e ish-presidentit Ilir Meta për ndryshimin e masës së sigurisë. Seanca do të mbahet në orën 11:30 dhe do të drejtohet nga gjyqtari i hetimit paraprak, Erjon Çaça.

Meta, i cili ndodhet në paraburgim që prej 21 tetorit 2024, kërkon zëvendësimin e masës “arrest në burg” me një masë sigurie më të butë. Avokatët e tij argumentojnë se janë shkelur afatet procedurale, pasi kanë kaluar mbi tetë muaj nga vendosja e masës pa u paraqitur ndonjë informacion dy mujor nga SPAK, siç parashikohet nga ligji.

Në kërkesën e depozituar pranë gjykatës, mbrojtja e Metës ka përfshirë edhe disa vendime të Gjykatës Evropiane për të Drejtat e Njeriut duke përmendur raste analoge, përfshirë edhe çështjen “Gëllçi”, si precedentë për interpretimin e të drejtave të të paraburgosurve dhe afateve të qëndrimit në paraburgim.

Gjykata pritet të shqyrtojë nëse janë plotësuar kushtet ligjore për vazhdimin ose ndryshimin e masës së sigurisë ndaj ish-kreut të shtetit.

LEXONI GJITHASHTU:

• Ilir Meta kërkon ndryshimin e masës së sigurisë: Janë shkelur afatet
• Iu zgjatën hetimet me 6 muaj, Ilir Meta reagon nga burgu: Do dal më i fortë