Zbardhet vrasja e 52-vjeçares: I dashuri e qëlloi 50 herë me thikë

Detaje tronditëse kanë dalë në dritë në lidhje me vrasjen e 52-vjeçares Kozeta Teço, në Pogradec, e cila u ekzekutua nga i dashuri i saj 31-vjeçar, Ilirian Selmani.

31-vjeçari pranoi para autoriteteve se është ai autori i krimit të rëndë.

52-vjeçarja u ekzekutua me një thikë të vjetër buke, me të cilën u qëllua mbi 50 herë.

Sipas të dhënave paraprake nga grupi hetimor, pas krimit autori ka tentuar të fshijë gjurmët e gjakut dhe më pas i ka vënë flakën banesës. Megjithatë, pamjet e siguruara nga kamerat e sigurisë dhe provat e tjera në vendngjarje kanë qenë vendimtare për zbardhjen e plotë të ngjarjes.

Fillimisht, i dyshuari ka mohuar akuzat, duke pretenduar se në momentin e vrasjes ndodhej në Korçë dhe se kur ishte kthyer në Pogradec kishte mësuar për vdekjen e partneres së tij. Ai ka deklaruar gjithashtu se lidhja e tyre kishte zgjatur tre vite dhe se vinte nga një “familje e mirë” që, sipas tij, nuk do të mund të prodhonte një vrasës.

Pas një maratone prej shtatë orësh në polici, ku u ballafaqua me provat, përfshirë edhe dëmtime fizike të marra gjatë përleshjes dhe një eksperiment hetimor të kryer në vendin e ngjarjes, 31-vjeçari ka pranuar krimin para grupit hetimor. Fillimisht ka pretenduar se kishte gjetur peshqirë me gjak dhe i kishte hedhur në mbeturina, duke menduar se mund të ishte therur ndonjë kafshë, për shkak të obsesionit të partneres për pastërtinë.

Në dëshminë e dhënë pas rrëfimit, autori ka pohuar se viktima kishte probleme me alkoolin dhe se kohët e fundit ishte bërë agresive dhe ushtronte dhunë ndaj tij.

Hetimet vijojnë për të zbardhur plotësisht rrethanat e ngjarjes dhe për të siguruar çdo provë të nevojshme ligjore për procedurat gjyqësore që do të pasojnë.

LEXONI GJITHASHTU:

• Del para gjykatës Ilirjan Selmani, provat e prokurorisë për vrasjen e Kozeta Teços
• Detajet e vrasjes së 52-vjeçares në Pogradec, policia njofton arrestimin e autorit
• “E doja pavarësisht moshës”, dëshmia e të riut që vrau 52-vjeçaren në Pogradec