Zbardhjet vrasja e Faik Ajdinit: U urdhërua nga çifti në Gjirokastër, autori 23-vjeç

Policia e Gjirokastrës ka zbardhur dhe dokumentuar vrasjen e 72-vjeçarit, Faik Ajdini, i cili ditën e hënë u gjet pa shenja jeta në një kanal në fshatit Zhapokikë. Në prangat e policisë ka përfunduar 23-vjeçari Berti Kanushi, si autor i dyshuar i ngjarjes.

Drejtori i policisë së Gjirokastrës, Ardian Çipa, bëri me dije përmes një konference për media dhe detajet nga ngjarja e rëndë. Ai tha se personat që shtyn 23-vjeçarin për kryerjen e krimit janë çifti Skënder Ajdini dhe Darovi Ajdini, gjithashtu të arrestuar.

Pas një konflikti për motive të dobëta që çifti Ajdini pati me 72-vjeçarin, ata kontaktuan Berti Kanushin dhe e ndihmuan që të kryente vrasjen e tij. Gjithashtu çifti ndihmoi autorin në fshehjen e provave me qëllim që ngjarja të mos zbardhej e trupi të mos gjendej.

Në pranga ka përfunduar dhe djali i çiftit Ajdini, Bledar Hajdini, i cili ka përkrahur autorin e ngjarjes.

“Nga dinamika hetimore u konkludua se për shkak të konflikteve për motive të dobëta ndërmjet viktimës, shtetasit Faik Ajdini, dhe bashkëshortëve Skënder dhe Darovi Ajdini, këta të fundit kanë nxitur shtetasin Blerti Kanushi, 23 vjeç, i kanë krijuar kushtet dhe i kanë siguruar mjetet, për kryerjen e vrasjes. Ky shtetas, në bashkëpunim me shtetasin Skënder Ajdini, më datë 19 gusht 2024, rreth orës 07:00 të mëngjesit, kanë kryer vrasjen me thikë të shtetasit Faik Ajdini dhe më pas Blerti Kanushi është larguar nga vendi i ngjarjes. Pas kryerjes së krimit, Skëndër Ajdini me shtetasen Darovi Ajdini kanë kryer veprime aktive për pengimin e zbulimit të së vërtetës, duke bërë përpjekje për të zhdukur provat e krimit. Shtetasi Bledar Ajdini, në dijeni të plotë për krimin, ka përkrahur autorin e krimit, duke mos informuar institucionet ligjzbatuese për vendndodhjen e tij.

Nga sqarimi i rrethanave të ngjarjes dhe mekanizmit të ndodhjes së saj, nga ana jonë është organizuar puna për lokalizimin e kapjen e shtetasit Blerti Kanushi dhe sekuestrimin e të gjitha provave që dokumentonin autorësinë e tij në këtë krim të rëndë. Në vijim të hetimeve, më datë 20.08.2024 në orën 23:30, janë arrestuar në flagrancë shtetasit:

1 . Skënder Ajdini, 71 vjeç për veprat penale “Vrasja me paramendim” e kryer në bashkëpunim, “Sigurimi i kushteve dhe mjeteve materiale për të kryer vrasje” dhe “Përkrahja e autorit të krimit”, parashikuar nga nenet 78/25, 80 dhe 302 të Kodit Penal;

2 . Bledar Ajdini, 43 vjeç, për veprën penale “Përkrahja e autorit të krimit”, parashikuar nga neni 302 i Kodit Penal.

Gjithashtu, në ndjekje të vazhdueshme dhe të pandërprerë të veprimeve operacionale dhe hetimore në terren, më datë 22.08.2024, ora 03:00, u arrestua në flagrancë shtetasi Blerti Kanushi, 23 vjeç për vepren penale “Vrasja me paramendim”, kryer në bashkëpunim, parashikuar nga neni 78/25 i Kodit Penal dhe shtetasja Darovi Ajdini, 64 vjeçe, për veprat penale “Veprime që pengojnë zbulimin e së vërtetës” dhe “Përkrahja e autorit të krimit”, parashikuar nga nenet 301 dhe 302 i Kodit Penal.

Nga gjithë tërësia e veprimeve hetimore të kryera, u arrit të gjenden, fiksohen dhe sekuestrohen me cilësinë e provës materiale, thika me të cilën ka kryer krimin autori, si dhe sende e mjete të tjera të cilat kanë influencuar në rrethanat e ngjarjes, të shfrytëzuara nga të dyshuarit. Këto sende dhe mjete do t’iu nënshtrohen ekzaminimeve të mëtejshme shkencore”, tha Çipa.

LEXONI GJITHASHTU:

• Vrasja me sëpatë e thikë e Faik Hajdinit në Memaliaj, prangosen babë e bir! Ja rolet
• Vrasjet në Velipojë| Artan Hoxha: Zjarri është ndezur, s’mund të ngujosh një fis