Zeja që i mbijetoi modernizimit, zanati më i vjetër ruhet me fanatizëm në Shkup

Çarshia e vjetër e Shkupit dikur ka qenë një ndër qendrat kryesore të Ballkanit, ndërsa tani numërohen në gishta zejet të cilat i kanë mbijetuar modernizimit.

Do të shohim një prej zejeve që ende ka arritur që me metodat e vjetra të vazhdojë biznesin deri në ditën e sotme.

Familja Neziri nga Shkupi e ka ngritur biznesin e ngjyrosjes me bojë para 80 viteve dhe vijon ta ruajë me fanatizëm. Gjithçka çfarë ata bëjnë është autentike.

“Gjithçka punohet me dorë. Edhe pastrimi i kazanit me dorë, edhe ngjyrosja me dorë, edhe heqja e ujit me dorë…”, thotë Ekrem Neziri, zejtar.

Ekremi tregon si është procesi i punës për ngjyrosjen e materialeve të vjetra.

“Kjo është një batanije e punuar nga leshi, në dorë. Këtë myshteriu e ka trashëguar nga nëna dhe e ka sjellë për ta ngjyrosur. Këtë ngjyrë hiri, sikur në të kaltër. Unë e përgatis ngjyrën vetë që të vijë në këtë trajtë. Kjo pastaj matet sa kilogram ka dhe kështu e llogaris ngjyrën sipas kilogramëve…”, tregon zejtari.

Dyqani i familjes Neziri i ngjan një muzeu. Ekremi ka ruajtur pamjen autentike që nga viti 1939 kur zanatin e bojaxhiut e bënte babai i tij.

“Unë kam shumë dëshirë që ta punoj këtë profesion. Ja e shihni se edhe djali dëshiron ta punojë këtë zanat. Ky zanat asnjëherë nuk ka fund. Çdoherë duhet të dish si të përgatisësh ngjyrat…Është një art t’i përziesh dhe t’i përgatisësh ngjyrat…Këtë nuk duhet ta lëmë kështu, por duket se është lodhur sepse është e rëndë. Batanija i ka 4 kilogramë, ka edhe 10 kilogram ujë dhe kështu peshon 12, 13 kilogramë. E shihni se kjo tashmë ka filluar ta marrë ngjyrën dhe uji zbehet”, tregon Neziri.

Për t’u ngjyrosur një palë pantallona paguhet një shumë simbolike prej 3 euro e gjysmë. Dyqanin e ngjyrosjes së Ekrem Nezirit e kanë vizituar shumë zyrtarë të lartë të shtetit, por edhe të vendeve të tjera, ndërsa fotografitë nga takimi me ta Ekremi i ruan me fanatizëm. Dëshira e vetme e Ekrem Nezirit është që përveç djalit, edhe nipat e tij ta trashëgojnë këtë profesion.

LEXONI GJITHASHTU:

• “Siç e do tradita”, Ylli Gurra tregon se ku bëhet vizita e parë për Fitër Bajram
• Punimi i thuprës, tradita që po zhduket në komunitetin Rom. Të rinjtë s’e preferojnë