Zelenski, mesazh vendeve të G7-s: Shtoni presionin ndaj Rusisë

Fuqitë ekonomike të botës u lidhën të hënën, në mënyrë virtuale me presidentin ukrainas Volodimir Zelenski, të cilit i rikonfirmuan angazhimin ndaj Ukrainës “për sa kohë do të jetë e nevojshme”, shoqëruar me planet për të vendosur një kufi ndaj çmimit të naftës ruse, rritjen e tarifave për mallrat ruse dhe vendosja e sanksioneve të reja.

 “Mendoj se uniteti i vendeve të G7-s ka një arsye. Logjika e pozicionit tonë është e qartë. Nuk ka marrëveshje që presidenti Zelenski mund të nënshkruajë, ndaj në këto rrethana mbështetësit e Ukrainës nëpër botë duhet të vijojnë mbështetjen për këtë vend, për ringritjen e ekonomisë, për nxjerrjen e grurit, eksportin e tij dhe natyrisht, për të mbrojtur popullsinë. Dhe ne këtë do vazhdojmë të bëjmë,” – tha kryeministri i Britanisë së Madhe, Boris Johnson.

Nga ana e tij, Zelenski deklaroi se dëshiron që lufta të përfundojë përpara dimrit dhe u bëri thirrje liderëve të G7-s që të vazhdojnë presionin ndaj Rusisë.

Ai kërkoi gjithashtu armatime më të rënda, si sisteme mbrojtëse anti-ajrore dhe sanksione të mëtejshme.

Në këtë aspekt, Shtetet e Bashkuara njoftuan blerjen e një sistemi të avancuar raketor tokë-ajër për të ndihmuar Kievin kundër agresionit të presidentit rus Vladimir Putin.