Kryeministri Edi Rama ka reaguar pas votimit të Blerina Balës si kryetare e komanduar e Bashkisë Himarë.

Përmes një postimi në rrjetin social X, Rama e cilëson votimin e sotëm një zhvillim pozitiv.

Sipas tij, “përpjekja e dështuar e një grushti individësh të nxitur për ta penguar këtë zhvillim të bazuar në detyrimin përkatës ligjor të Këshillit Bashkiak, tregoi qartë faktin e thjeshtë se shumica e madhe e himarjotëve nuk i përkasin llogores së konfliktit”.

“Zgjedhja e sotme nga Këshilli Bashkiak të Himarës, me 15 vota pro dhe vetëm 4 kundër, e nënkryetares së bashkisë, Blerina Bala, si kryetare në detyrë është një zhvillim pozitiv për vazhdimin e punës së qeverisë vendore. Përpjekja e dështuar e një grushti individësh të nxitur për ta penguar këtë zhvillim të bazuar në detyrimin përkatës ligjor të Këshillit Bashkiak, tregoi qartë faktin e thjeshtë se shumica e madhe e himarjotëve nuk i përkasin llogores së konfliktit, përçarjes dhe amplifikimit absurd të një sherri primitiv, i cili ushqehet për interesa dhe hesape që s’kanë asnjë lidhje me interesat dhe nevojat legjitime të popullit të Himarës”, shkroi Rama.

LEXONI GJITHASHTU:

• Gjikuria: Pse u tërhoqa në momentet e fundit nga votimi për drejtimin e Himarës
• Zgjidhet kryetarja e re e Bashkisë Himarë