Zgjedhjet e 14 majit, Lealba Pelinku: Votim dhe numërim elektronik në dy zona

Nënkomisionerja e Komisionit Qendror të Zgjedhjeve, Lealba Pelinku deklaroi se në zgjedhjet vendore që do të zhvillohen më 14 maj të vitit të ardhshëm do të ketë votim dhe numërim elektronik në dy zona, ashtu si në zgjedhjet e përgjithshme të 25 prillit dhe të pjesshme vendore të 6 marsit.

Në një intervistë për Euronews Albania, Pelinku u shpreh se KQZ-ja ka në dispozicion të njëjtin numër pajisjesh për shkak të buxhetit.

KQZ-ja kishte kërkuar votim dhe numërim elektronik në 2600 qendra votimi, por Pelinku u shpreh se qeveria nuk akordoi fondin, që shkonte në 30 milionë euro.

“Votimi dhe numërimi elektronik, projekti pilot i aplikuar për zgjedhjet e përgjithshme të 25 prillit 2021 dhe ato të pjesshme të këtij viti, u aplikua për shkak edhe të numrit të pajisjeve të zotëruara nga KQZ, në njësinë 10 dhe në Bashkinë Vorë. Edhe për këto zgjedhje, për shkak të buxhetit do të jetë po i njëjti numër pajisjesh që do të përdoren.

Mbetet për t’u përcaktuar një zonë zgjedhore, e cila t’i përshtatet këtij numri të pajisjeve. Mesa duket, nga qeveria nuk ka patur vullnet për t’i akorduar këtë fond KQZ-së. Për 2600 qendra votimi, fondi i kërkuar ka qenë 30 milionë euro”, theksoi ajo.

Presidenti Bajram Begaj, caktoi 14 majin 2023 si datën e zhvillimit të zgjedhjeve vendore të ardhshme.

LEXONI GJITHASHTU

• Begaj cakton 14 majin, Celibashi: Gati për të respektuar standardet ndërkombëtare
• Më 14 maj do të zhvillohen zgjedhjet vendore