Zgjedhjet e 14 majit/ Rrumbullaku: 5 mijë policë në terren, u evidentuan 54 shkelje

Drejtori i Përgjithshëm i Policisë së Shtetit Muhamet Rrumbullaku tha një konferencë për shtyp të mbajtur këtë të premte se gjatë fushatës elektorale janë evidentuar gjithsej 54 raste të veprave penale në fushën e krimeve zgjedhore e ndër ta janë proceduar penalisht 88 qytetarë.

Gjithashtu Rrrumbullaku bëri apel që qytetarët të denoncojnë çdo rast që cenon të drejtën e tyre për të votuar, apo që synon të tjetërsojë votën e tyre

“Nga data 14.04.2023 deri më 12.05.2023, janë evidentuar gjithsej 54 raste të veprave penale në fushën e krimeve zgjedhore, për të cilat janë proceduar penalisht gjithsej 88 shtetas.

Të ndara sipas veprave penale:

1-Dhënia e shpërblimeve dhe e premtimeve, 25 raste me 45 autorë;

2-Përdorimi i funksionit publik për veprimtari politike apo zgjedhore, 1 rast me 1 autor;

3-Korrupsioni pasiv në zgjedhje, 20 raste me 25 autorë;

4-Kanosja apo dhunimi ndaj pjesëmarrësve në zgjedhje, 2 raste me 3 autorë;

5-Pengimi i zgjedhësit, 3 raste me 7 autorë;

6-Shkelja e të drejtës së zgjedhjes, 3 raste me 7 autorë.

Për veprat penale të sipërcituara, grupet e posaçme hetimore kanë vepruar në përputhje të plotë me ligjin dhe me autorizimet e organeve proceduese, si dhe vijojnë hetimet e thelluara për dokumentimin e plotë ligjor të këtyre rasteve.

Tashmë kemi mbërritur në fazën finale të këtij procesi, dhe detyrat dhe angazhimi i Policisë së Shtetit janë më të shtuara, me qëllim që të garantohet rendi dhe siguria publike, si dhe që çdo qytetar i Republikës së Shqipërisë të ushtrojë qetësisht dhe i sigurtë, të drejtën kushtetuese për të votuar.

Në përfundim, apeloj që qytetarët të denoncojnë çdo rast që cenon të drejtën e tyre për të votuar, apo që synon të tjetërsojë votën e tyre.

Njëkohësisht, apeloj për të gjitha subjektet politike, që të zbatojnë me korrektësi detyrimet ligjore dhe të bashkëpunojnë me Policinë e Shtetit, për çdo rast të cenimit të ligjit.

Policia e Shtetit është shumë e vendosur dhe e angazhuar për të siguruar deri në fund mbarëvajtjen e procesit zgjedhur, si dhe për  mbajtjen në kontroll të plotë të të gjithë territorit të vendit, me qëllimin e vetëm,  sundimin e ligjit”,-tha Muhamet Rrumbullaku në konferencën për mediat.

LEXONI GJITHASHTU:

• Bajram Begaj mesazh për 14 majin: Ju lutem flisni me votë, është momenti juaj
• Vrau foshnjën duke i mbushur gojën me pambukë, nëna adoleshente del para gjyqit