Zgjedhjet lokale në RMV, BDI: Fituam Gostivarin, balotazh në Strugë dhe Kërçovë

Nënkryetari i BDI-së, Arbër Ademi në konferencë për shtyp ka dhënë detaje të reja në lidhje me zgjedhjet lokale. Ademi shpalli fitoren në komunë e Gostivarit dhe njoftoi se kandidatët e koalicionit AKI-së për Strugën dhe Kërçovën shkojnë në balotazh me kandidatët e VMRO-DPMNE-së.

“Edhe në tre Komuna ët tjera, në Gostivar pa balotazh që në raundin e parë. Që sone kryetar i Gostivarit është zoti Valbon Limani. Në Kërçovë dhe në Strugë kandidatët tanë shkojnë në balotazh kundrejt dy kandidatëve të VMRO-së”, tha Ademi.

Sipas njoftimeve nga partia, Suat Shaqiri do të jetë kryetari i ardhshëm i komunës së Çashkës, duke hyrë në histori si shqiptari i parë që udhëheq këtë komunë. Ademi tha se fitorja në Çashkë vjen krahas rezultateve të ngjashme në Likovë, Pllasnicë dhe Gostivar, ndërsa në disa komuna të tjera gara do të vazhdojë në raundin e dytë.

“E fillojmë fitoren e madhe me fitore në raundin e parë në dy komuna, në Likovë ku kandidati ynë Erkan Arifi ka fituar, dhe në Pllasnicë. Po ashtu, në Gostivar dhe Çashkë qytetarët na dhanë besimin. Në Strugë do të përballemi me Mendi Qyrën, ndërsa në Kërçovë me kandidatin e VMRO-DPMNE-së,” deklaroi Ademi.

Procesi zgjedhor në këto komuna është vlerësuar përgjithësisht si i qetë, ndërsa rezultatet zyrtare pritet të konfirmohen nga Komisioni Shtetëror i Zgjedhjeve.