Zgjedhjet në 28 dhjetor, Hamza mbledh kryesinë e partisë

Partia Demokratike e Kosovës (PDK) po pret me gatishmëri zgjedhjet e parakohshme që do të mbahen me 28 dhjetor, të shpallura dje nga presidentja e vendit, Vjosa Osmani.

Kështu ka thënë kryetari i partisë, Bedri Hamza, në një konferencë për media pas takimit të tij me kryesinë e partisë.

Sipas tij, përfaqësuesit e partisë premtojnë sukses në këtë drejtim.

Hamza preku edhe çështjen e pagave të Radio Televizionit të Kosovës, të cilat janë vonuar, e për të cilat RTK mbajti protesta të shumta

Në konferencë, kryetari i PDK-së u pyet edhe për anëtarësinë e Ramiz Lladrovcit, për të cilin ai pohoi se nuk u përjashtua asnjëherë nga partia.

“Ramiz Lladrovcin askush nuk e ka përjashtuar nga PDK, unë nuk kam parë asnjë vendim që thotë zoti Lladrovci nuk është PDK, nuk ka diçka të tillë brenda PDK-së. Prandaj, jam i bindur që ne të gjithë do të vazhdojmë të garojmë dhe të maksimalizojmë votën për Partinë Demokratike të Kosovës” tha ai.