Zjarret në Gramsh përhapen në zona të reja, dëme të mëdha në banesa dhe blegtori

Rreziku nga zjarret në Gramsh është zhvendosur në zona të reja që nga mbrëmja e së mërkurës, duke përfshirë fshatin Ermenj në Njësinë Administrative Skënderbegas, si dhe Teqen e Dushkut, ku raportohen disa vatra aktive.

Dendësia e pyjeve po e vështirëson ndërhyrjen e ekipeve të emergjencave civile për izolimin e flakëve.

Aktualisht, pylli në pjesën e sipërme të fshatit, në krahun lindor, vijon të digjet ndërsa nëse zjarri nuk vihet nën kontroll, ekziston rreziku që ai të përhapet në territorin e Prefekturës së Korçës.

Gjatë natës dhe orëve të para të mëngjesit janë zhvilluar ndërhyrje në pyllin me pisha që shtrihet drejt fshatit Nartë, duke arritur të ndalet avancimi i flakëve në këtë drejtim.

Në Njësinë Administrative Kukur, situata mbetet problematike, megjithatë ekipet e emergjencës arritën të frenojnë përhapjen e zjarrit gjatë natës.

Ndërkohë, vatra në Njësinë Administrative Kodovjat është mbajtur nën monitorim pa u riaktivizuar.

Sipas të dhënave zyrtare, deri më tani janë djegur 42 banesa në Skënderbegas dhe fshatra të tjerë, 130 krerë bagëti të imta, 22 gjedhë, 1 thundrak, 80 koshere bletësh dhe dhjetëra shpendë.

Për të shmangur rrezikun e shpërthimit të ndonjë epidemie, autoritetet kanë nisur groposjen e kafshëve të ngordhura, ndërsa shërbimi veterinar po kryen procesverbalet përkatëse.

Numri i të evakuuarve ka arritur në 46 persona, pasi mbrëmë u strehuan edhe 6 banorë të tjerë në konviktin shtetëror, përveç 40 të evakuuarve të një dite më parë.

Në terren janë angazhuar 50 efektivë të ushtrisë, 7 mjete zjarrfikëse dhe rreth 200 vullnetarë. Bilanci paraprak tregon se rreth 10 fshatra në territorin e Gramshit janë prekur nga flakët, ndërsa në Bletëz dhe Shëmbërdhenj dëmet janë totale.

Autoritetet lokale dhe qendrore u bëjnë apel banorëve për kujdes dhe bashkëpunim, ndërsa operacionet për shuarjen e zjarreve do të vijojnë gjatë gjithë ditës.

LEXONI GJITHASHTU:

• Zjarri në afërsi të Parkut të Gërmenjës shtrihet drejt Greqisë, si paraqitet situata
• “Neveri për lehaqeniet”, Rama: Situata nga zjarret e përmirësuar falë sakrificave