Zjarri djeg kullotat midis Tepelenës dhe Gjirokastrës, ndërhyjnë zjarrfikësit

Një zjarr masiv ka përfshirë kullotat midis Gjirokastrës dhe Tepelenës duke djegur sipërfaqe të konsiderueshme. Flakët janë shfaqur mbrëmjen e së shtunës në kufirin ndarës të dy bashkive atë  të Gjirokastrës dhe Tepelenës, midis fshatit Hormovë dhe Labovë.

Zjarri ka vazhduar përgjatë mesnatës dhe orëve të para të së dielës.

Zjarri ka qenë në shpatin e malit ndërsa flakët kanë përfshirë barëra dhe shkurre. Terreni i thepisur dhe errësira e bëri të vështirë ndërhyrjen për shuarjen e flakëve gjatë natës.

Rreth orës 03.30 të së dielës 17 zjarrfikës të Gjirokastrës, vullnetarë dhe banorë të zonës kanë

nisur punën për fikjen e këtij zjarri që ndodhej në mal, mbi fshatin Labovë. Në vendngjarje kishte disa vatra zjarri dhe zjarrfikësit ndërhynë me pompa shpine dhe mjete rrethanore për izolimin deri në fikjen e plotë të zjarrit. Një pjesë e grupit të ndërhyrjes vazhdon të qëndrojë në vendngjarje për të monitoruar  duke mos lejuar riaktivizimin e vatrave të zjarrit në zonë.