Zv.kryeministri i parë shqiptar në RMV në “Balkan Talks”: Sfidë, krijimi i marrëdhënieve mes bashkësive etnike kombëtare

Krijimi i marrëdhënieve të mira mes bashkësive etnike dhe vendosja e partive politike në baza ideologjike e jo etnike janë sfidat e ministrisë për sistem politik dhe marrëdhënie ndërmjet bashkësive. Kështu u shpreh zv.kryeministri i parë shqiptar i Maqedonisë së Veriut, gjatë intervistës për emisionin “Balkan Talks”.

Z.Grubi përveç se është zv.kryeministri i parë është edhe drejtuesi i ministrisë së re e cila do të merret me sistemin politik. Ai tregon se përse ishte i nevojshëm krijimi i kësaj ministrie.

“Instituti Evropian i Paqes zhvilloi një analizë cilësore të Marrëveshjes së Ohrit dhe zbatimit të saj në praktikë dhe doli me rekomandime se Sekretariati për zbatimin e marrëveshjes duhet të kthehet në ministri nëpërmjet ndryshimeve ligjore,”- u shpreh Grubi duke theksuar se “ministria ka kompetenca shumë të gjera në lidhje me sistemin politik, duke filluar nga himni kombëtar e deri te kufijtë e shtetit”.

Vendosja e partive politike në baza ideologjike dhe jo etnike mendohet që do të arrihet në një të ardhme të afërt, por për të arritur këtë sipas z.Grubi duhet që besnikëria e shtetit ndaj komunitetit të përkthehet në besnikëri të komunitetit ndaj shtetit.

 “Shembulli i zbatimit të Marrëveshjes së Ohrit si themel i marrëdhënieve midis dy komuniteteve të shumicës shqiptare dhe maqedonase është shembulli më i mirë i rrugës drejt arritjes së barazisë së plotë. Nuk jemi në barazi të plotë akoma edhe pse është arritur jashtëzakonisht shumë,”- tregoi Grubi.

I pyetur nga gazetari Franko Egro nëse përmirësimi i klimës politike ka arritur të përçohet në popullsi ai u shpreh se po dhe kjo është një gjë e mirë.

Një tjetër çështje që u diskutua është edhe fakti nëse ka pasur ngecje në zbatimin e gjuhës shqipe, pasi ajo u bë gjuhë zyrtare në Maqedoninë e Veriut.

 “Ka ngecje në zbatim, po me rëndësi është që u pranua fakti që gjuha shqipe është gjuha e dytë zyrtare institucionale në këtë shtet. Kemi themeluar me ligj dhe Inspektoratin për zbatimin e gjuhës shqipe, i cili do ndëshkojë mosrespektime të tilla të ligjit,”- tha Grubi.

Gjatë intervistës Grubi u pyet nëse mendonte se Shqipëria ka lidhje me frenimin e ecurisë të negociatave së RMV-së në Bashkimin Evropian gjë të cilën ai e mohoi.

 “Në fakt Maqedonia e Veriut kishte probleme shumë serioze, problem me fqinjët e saj qoftë në Athinë, qoftë në Sofje. Kishte problemet e brendshme rreth kohezionit shoqëror dhe zbatimit të Marrëveshjes së Ohrit, por me guximin e duhur i tejkaluam të gjitha këto çështje”- tregoi Z.Grubi.

Në fund të intervistës zv. kryeministri shqiptar në qeverinë e RMV-Së u ndal edhe te Marrëveshja e Ohrit duke thënë se pjesët normative të saj janë miratuar në Kuvend, por zbatimi i tyre nuk përfundon asnjëherë dhe ato do të zbatohen çdo ditë.