Zyrtarët policorë dhe rekrutët në Kosovë do të trajtohen me prioritet në spitale

Ministri i Brendshëm i Kosovës, Xhelal Sveçla, ka njoftuar këtë të shtunë marrëveshjen e arritur me SHSKUK për pjesëtarët e Policisë së Kosovës, sipas të cilës policët do të trajtohen me prioritet nga spitalet e vendit.

Sveçla ka prezantuar marrëveshjen e arritur përmes një postimi në facebook ku thekson “mbështetje të kualifikuar për kontrollet shëndetësore” të zyrtarëve policorë.

“Zyrtarët policorë dhe rekrutët do të trajtohen me prioritet, përfshirë edhe në listat e pritjes në Shërbimin Spitalor Klinik Universitar të Kosovës pra dhe në të gjitha Spitalet Rajonale të Republikës së Kosovës”, ka thënë Sveçla përmes një postimi në Facebook.

Sipas ministrit, personelit policorë dhe rekrutëve “do t’iu ofrohen me prioritet dhe pa pagesë shërbimet mjekësore, psikologjike dhe specialistike të nivelit dytësor dhe tretësor në ShSKUK dhe në të gjitha Spitalet Rajonale”.

Sveçla ka përmendur, po ashtu, se marrëveshja i ka dhënë rëndësi të veçantë edhe shëndetit të zyrtarëve gra në Polici të Kosovës, përmes kontrolleve specifike.

LEXONI GJITHASHTU:

• Escobar mesazh Vuçiç dhe Kurtit: Zbatimi i marrëveshjes, detyrim
• “Të na jepet statusi i vendit kandidat”, Kurti tregon në Kuvend se çfarë i kërkoi BE
• Eksperti Shala tregon emrin e hartuesit të draft asociacionit