“1 orë për të rrahur ballokumet në legen”, nënë Buqja zbulon sekretet e recetës

Nënë Buqja nga Elbasani ka treguar se sekreti për të bërë ballokume të mira është te rrahja e tyre. Në një intervistë për emisionin “Good Morning Albania”, ajo tregoi se ena për të përgatitur këtë ëmbëlsirë duhet të jetë prej bakri dhe  jo enë plastike, ndërsa luga duhet të jetë prej druri.

Gjithashtu ajo tha se një tjetër sekret për të realizuar recetën e ëmbëlsirës së Ditës së verës është se përdoret edhe finja, uji me hi.

“Kam pasur një tenxhere ku rriheshin ballokumet dhe ajo ishte prej bakri. Nuk rriheshin ballokumet nëpër plastikë. Ballokumja ka një sekret. Ka miellin e misrit, gjalpin vezët, ujë finje, që është uji me hi.

Sekreti i madh është që ne kur rrihnim ballokumet uleshin në tokë dhe i rrihnim për një urë me lugë druri. Jo me këto mikserat që kanë dalë tani. Rrahja ishte në të njëjtin drejtim.

Ne uleshim poshtë, e vinim legenin mes këmbëve dhe i rrihnim në një drejtim dhe ato bëheshin të buta”, tha nënë Buqja, zonja nga Elbasani për Euronews Albania.

LEXONI GJITHASHTU:

• Meta uron Ditën e Verës duke recituar poezinë e Ndre Mjedës
• E keni ditur? Ballokumet e Elbasanit kërkojnë enë të veçantë bakri për t’u gatuar