10 ngjarjet kryesore të orëve të fundit në Ukrainë

Lufta në Ukrainë ka hyrë sot në ditën e 21-të. Ndërsa forcat ruse po përpiqen të avancojnë drejt Kievit, Ukraina bën thirrje për më shumë ndihma ushtarake dhe humanitare nga Perëndimi.

• Ushtria e Ukrainës pretendon se 13 800 ushtarë rusë janë vrarë që prej nisjes së pushtimit të Ukrainës më 24 shkurt. Sipas raportit të bërë publik nga Ministria e Mbrojtjes janë shkatërruar 430 tanke, 1 375 mjete luftarake, 190 sisteme artilerie dhe 108 helikopterë.
• Holanda dhe vende të tjera anëtare të NATO-s do të vazhdojnë t’i ofrojnë armë Ukrainës edhe pse dërgesat mund të bëhen shënjestër e sulmeve ruse, shprehet ministrja e holandez e Mbrojtjes, Kajsa Ollongren.
• NATO pritet të mbledhë gjeneralët ushtarakë gjatë ditës së mërkurë për të hartuar një plan se si mund t’i bëjnë ballë Rusisë pas pushtimit të Ukrainës.
• Kompania shtetërore ruse e energjisë, Gazprom thotë se vazhdon të dërgojë gaz në Evropë përmes Ukrainës, me një volum ditor prej 95 metër kub, raporton ‘Reuters’.
• Qyteti i dytë më i madh në Ukrainë, Kharkiv ka qenë në sulm gjatë mesnatës së martë dhe mërkurë, ku mes viktimave kanë mbetur dhe civilë. Përveç rezidencave të banimit, nga bombardimet është shkatërruar dhe një shkollë.
• Ministri britanik i Mbrojtjes duke iu referuar të dhënave të shërbimeve inteligjente, thotë se forcat ruse po hasin vështirësi nga terreni në Ukrainë dhe kjo po bëhet pengesë për avancim.
• Nga sulmet e fundit në Kiev, të paktën 12 ndërtesa banimi janë dëmtuar. Dy persona janë plagosur ndërsa 37 të tjerë kanë mundur të evakuohen. Punonjësit po kërkojnë për viktima nën rrënoja.
• Dy gazetarë të televizionit amerikan Fox News janë vrarë në Ukrainë, bën me dije stafi. Kameramani Pierre Zakrzewski, 55 vjeç dhe Oleksandra Kuvshinova, 24, humbën jetën pasi makina e tyre u qëllua në periferi të Kievit.
• Forcat ruse raportohet se kanë marrë pacientë dhe staf mjekësor nga spitalet në qytetin e rrethuar në Mariupol. Sipas BBC, zv.kryebashkiku, Sergei Orlov thotë se në spital ishin 400 pacientë dhe mjekë, të cilët Rusia po i përdor si pengje.
• Presidenti i Ukrainës, Zelensky pritet që të mërkurën të mbajë një fjalim në Kongresin Amerikan, ku do të bëjë thirrje për ndalimin e fluturimeve mbi Ukrainë dhe do të kërkojë më shumë ndihma ushtarake, përfshirë avionë luftarakë. Gjatë një fjale drejtuar vendin në mesnatë, Zelensky ka konfirmuar takimin mes zyrtarëve ukrainas dhe rusë duke shtuar se negociatat tanimë janë më realiste.