17 zjarre aktive në vend, digjen pyje në Himarë, Vlorë, Prespë dhe Dibër

Shqipëria vazhdon të mbetet nën pushtetin e flakëve, me situatën më kritike që paraqitet në rajonet e jugut.

Agjencia Kombëtare e Mbrojtjes Civile njofton se gjatë 24 orëve të fundit ka pasur 34 vatra zjarri në vend, nga të cilat 17 janë ende aktive.

Zjarri në disa fshatra të bashkisë së Himarës, në Sasaj, Lukovë dhe Shën Vasil është vendosur në kontroll pas ndërhyrjes së helikopterit, dhe mbeten aktive 3 vatra të tjera.

Forca të shumta të zjarrfikësve, Policia dhe emergjencat civile prej 4 ditësh kanë qëndruar në terren për të izoluar flakët.

Ndërkohë, zjarri vijon edhe në Parkun Kombëtar të Prespës, me 150 forca të emergjencës që po punojnë për të vënë në kontroll flakët.

Në qarkun e Dibrës raportohen 4 vatra, nga të cilat më problematike mbetet ajo në Parkun Kombëtar Lurë.

Një pjesë e zjarreve kanë pasur edhe autor, të cilët janë arrestuar nga Policia. I fundit që është vënë në pranga, një 80-vjeçar nga Vau i Dejës, akuzohet se ka ndezur zjarr në varrezat e fshatit Barbullush dhe si pasojë e përhapjes së flakëve u dogj një sipërfaqe e konsiderueshme toke me shkurre.

LEXONI GJITHASHTU:

• NASA publikon pamjet satelitore të zjarreve në Delvinë
• Zjarret përfshijnë Greqinë, flakët vetëm 30 km larg Athinës