2 viktima dhe 125 të infektuar të tjerë, vazhdon prirja shqetësuese e COVID-19 në RMV

Autoritetet në Maqedoninë e Veriut raportuan të shtunën për 2 viktima dhe 125 të diagnostikuar të tjerë me COVID-19 duke e çuar totalin në 2915 të infektuar dhe 151 të vdekur.

Viktimat e fundit mes pacientëve me COVID-19 ishin 73 dhe 67 vjeç me origjinë nga Përlepi dhe Strumica. Ata ishin shtruar në spital prej rreth 3 javësh.

Prirja në rritje e të infektuarve mbetet shqetësuese në Maqedoninë e Veriut pasi po shton ndjeshëm edhe të shtruarit në spital.

Vetëm 8 persona u shëruan 24 orët e fundit me totalin që bën fjalë për 1640 të shëruar.

Prej 26 shkurtit, kur u diagnostikua i infektuari i parë, autoritetet maqedone kanë kryer mbi 35 mijë testime, prej të cilave janë diagnostikuar 2,915 të infektuar.

Prej së hënës numri i të infektuarve është shtuar me rreth 600 vetë ndërsa janë shënuar 11 viktima.

Vdekshmëria ndër pacientët me coronavirus mbetet alarmante, pasi ka shkuar mbi 5.2 për qind.

Në raport me popullsinë, Maqedonia e Veriut po vuan bilancin më të rëndë të pandemisë në rajon me mbi 72 vdekje për çdo 1 milionë banorë – pothuajse sa 7-fishi i raportit të vdekjeve që ka pasur Shqipëria.

Pikërisht për shkak të kësaj situate qeveria vendosi të rikthejë prej së enjtes e deri të hënën kufizimin e lëvizjes në disa qytete.

Lexoni gjithashtu:

COVID-19 përhapet më tepër në zonat me ajër të ndotur, BB këshillon shtetet e Ballkanit të marrin masa

Bilanci javor i COVID-19 në rajon, valë e re infektimesh në RMV, Bosnje e Hercegovinë, Shqipëri e Kosovë