3 javë pas sulmit kibernetik, rikthehen në normalitet shërbimet në e-Albania

Pas thuajse tre javësh nga sulmi kibernetik, shërbimet publike online janë rikthyer në normalitet të plotë në platformën e-Albania.

Lajmi është bërë i ditur nga Agjensia Kombëtare e Informacionit (AKSHI) përmes një njoftimi për mediat.

Aktualisht, 1214 nga 1225 shërbime online që jepen në platformën e-Albania, mund të përdoren nga qytetarët dhe bizneset me të njëjtën shpejtësi dhe lehtësi si më parë.

Aplikimi i formularit për lëshim për herë të parë ose rinovim të pasaportës, deklarimit të humbjes së dokumenteve të ndryshme, ndihmës ekonomike për individët dhe vërtetimit mbi masën e përfitimit të ndihmës ekonomike, janë disa nga shërbimet e tjera në funksion të plotë.

Ndërsa, shërbimet e tilla si njehsimi i diplomave dhe certifikatave të lëshuara nga institucionet e huaja, vërtetimi i pagesës së aftësisë së kufizuar si dhe kryerja e pagesave të ujit dhe energjisë elektrike, ende nuk ofrohen plotësisht,

AKSHI informon se janë forcuar mekanizmat e sigurisë së email-it zyrtar si dhe është bërë kalimi i çdo mailbox-i në infrastrukturën cloud.

Grupi që sulmoi portalet qeveritare ka vjedhur informacionet që janë shkëmbyer në adminstratë.

Faqja e internetit, “HomelandJustice”, e cila prej disa ditësh dërgon mesazhe në formë shantazhi, ka publikuar emailet e shkembyera mes kryeministrit dhe punonjësve e qytetarëve.

Një pjesë e tyre janë denoncime, vlerësime dhe propozime në adrese të kreut të qeverisë.

Qeveria nuk ka dalë me një qendrim përfundimtar për sulmin kibernetik, por ka thënë se të dhënat në e-albania dhe faqet e tjera online nuk janë fshirë.

LEXONI GJITHASHTU

• Sulmi kibernetik, hakerat nxjerrin e-mailet e kryeministrit Rama

• Sulmi kibernetik, hakerat publikojnë dokumente të institucioneve shtetërore
• Rama për sulmin kibernetik: Dyshojmë për dy shtete