“3500 € kalimi, ulje për të miturit”- Publikohen bisedat e trafikantëve shqiptarë

Grupet e trafikantëve shqiptarë që kalojnë ilegalisht drejt Britanisë së Madhe emigrantë të paligjshëm, vijojnë të mbeten kryefjala e mediave britanike.

Masat e marra nga autoritetet atje për frenimin e emigracionit të paligjshëm duket se nuk po japin rezultatin e pritshëm, duke bërë që këto grupe të vijojnë aktivitetin e tyre.

E përditshmja britanike “Daily Mail” përmes një investigimi, ka arritur lehtësisht të vihet në kontakt me disa prej trafikantëve shqiptarë, duke i kontaktuar ata përmes rrjeteve sociale apo edhe numrave të telefonit.

Ajo që evidentohet në artikullin e “Daily Mail” është fakti se këta trafikantë përdorin numra telefoni të regjistruar në Britaninë e Madhe dhe se kanë ndarë me ta edhe pagesat për organizimin dhe kalimin në destinacion.

3500 euro për person ishte çmimi që një prej trafikantëve të kontaktuar i bëri me dije agjentëve të cilët paraqiteshin si të interesuar për të shkuar në Mbretërinë e Bashkuar.

Kalimi do të bëhej me gomone ose Kamion.

Një tjetër prej tyre kalonte edhe të mitur të pashoqëruar, duke ofruar edhe një zbritje prej 500 eurosh, për një djalë 15 vjecar.

I vetmi kusht i tyre sipas bisedave të zbardhura në artikull ishin zbardhja e identitetit të personave që do të kalonin dhe fotot e pasaportave të atyre që do të paguanin për të kaluar ilegalisht në Britani.