Rama dhe Meta mesazhe për 8 Dhjetorin: Kemi të rinj energjikë

Këtë të diel shënohet Dita Kombëtare e Rinisë. Prej vitit 2009, me vendim të marrë nga Kuvendi i Shqipërisë, kjo datë përkujtohet si festë kombëtare në nderim të të gjithë studentëve të dhjetorit 1990 dhe gjithë rinisë shqiptare.

Më 8 dhjetor 1990, një grup studentësh e pedagogësh të Universiteteve të Tiranës, u bënë iniciatorë e protagonistë të kthesës së madhe historike, protestave paqësore që sollën rënien e sistemit komunist dhe lindjen e demokracisë.

Me shprehjen “E duam Shqipërinë si gjithë Europa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike.

Rezistenca e tyre i dha fund epokës të gjatë të vetëizolimit duke i hapur kështu rrugën e ekonomisë së tregut dhe shoqërisë së hapur.

Lëvizja Studentore e vitit 1990 është e vetmja Lëvizje paqësore që ndryshoi historinë e Shqipërisë.

8 Dhjetori, Rama: Qindra e mijëra të rinj të sotëm punojnë për një Shqipëri të transformuar në anekënd

Kryeministri Edi Rama me rastin e 8 Dhjetorit, Ditës Kombëtare të Rinisë, ndau një video me shembullin e Jon Goxhas, i cili ka vijuar traditën e familjes duke e çuar përpara biznesin e fabrikës së vajit të ullirit “Konispoli”.

“Respekt. Në këtë Ditë të Rinisë me mishërimin e qartë të forcës së shembullit të qindra e mijëra të rinjve të sotëm, që nën traditën e prindërve, por me energjinë dhe me vizionin për të ardhmen, punojnë, ndërtojnë e frymëzojnë për një Shqipëri të transformuar në anekënd”, shkruan Rama.

“Ne kemi një biznes familjar, fabrikë vaji. Duke qenë se ky është viti i 30-të i përpunimi të ullirit, duke përpunuar me një teknologji gjermane në gjithë këto 30 vite, duke sjellë në treg vaj me një kualitet shumë të mirë, ekstra i virgjër”, u shpreh Goxha.

“Në punishten tonë në përgjithësi janë të gjithë fermerët e zonës, të cilët sjellin produktin e tyre për ta përpunuar dhe për të sjellë produktin final të vajit të ullirit”, theksoi ai.

Meta mesazh nga burgu për Ditën e Rinisë: Besoj në shpirtin energjik të të rinjve për të marrë në dorë fatet e tyre

Ilir Meta ka përcjellë një mesazh nga burgu me rastin e 8 Dhjetorit, Ditë Kombëtare të Rinisë. Me anë të një postimi në Facebook, Meta shprehet besimplotë se të rinjtë do të marrin në dorë fatet e tyre dhe të vendit.

Pluralizmi politik, liria dhe demokracia- shkruan Ilir Meta- janë nën agresionin e një regjimi të dhunshëm.

“Gëzuar 8 Dhjetorin, Ditën Kombëtare të Rinisë!  Mirënjohje të veçantë ndaj Lidershipit Heroik të Azem Hajdarit, të gjithë djemve dhe vajzave, që 34 vite më parë, duke vrarë frikën i prinë me guxim, kurajë e patriotizëm Lëvizjes Studentore që e futi Shqipërinë në rrugën e Lirisë dhe të Demokracisë.

Unë besoj shumë në shpirtin energjik të të rinjve të Shqipërisë për të marrë në dorë fatet e tyre dhe të mbarë vendit, sot më shumë se kurrë, kur pluralizmi politik, liria dhe demokracia janë nën agresionin e një regjimi të dhunshëm.

Kjo është rruga për të ndaluar shpopullimin dhe garantuar një Shqipëri që u përket të rinjve”, thuhet në mesazhin e Metës.

Basha: 8 Dhjetori moment reflektimi mbi idealet e tradhtuara nga ata që e mbajtën peng Shqipërinë

Kryetari i Demokratëve Euroatlantikë, Lulzim Basha, ka përkujtuar sot 8 Dhjetorin, Ditën e Rinisë dhe Lirisë, duke vlerësuar guximin dhe vizionin e studentëve të Dhjetorit ’90. Në një postim në Facebook, Basha thekson se kjo ditë shërben si një kujtesë për sakrificën ndaj diktaturës dhe si një thirrje për ndërtimin e një të ardhmeje më të mirë.

Basha u bën thirrje të rinjve shqiptarë që të ndjekin shembullin e studentëve të Dhjetorit dhe të punojnë për një Shqipëri ku talenti, merita dhe mundësitë reale janë prioritet. Ai theksoi rëndësinë e ruajtjes së lirisë dhe demokracisë si trashëgimi e çmuar, duke apeluar për përkushtim të vazhdueshëm për një epokë të re shprese, zhvillimi dhe drejtësie.

“Është një moment reflektimi mbi idealet e tradhtuara të atij Dhjetori nga ata që e mbajtën peng Shqipërinë duke përvetësuar dhe vonuar ëndrrën e Shqipërisë si Europa” – shkrun Basha në postimin e tij.

LEXONI GJITHASHTU:

• Nesër 8 Dhjetori, të rinjtë e PD paralajmërojnë marshim-protestë
• Berisha me drejtuesit e qarqeve: Së shpejti nisin takimet me diasporën