Rama mbledh qeverinë dhe u kërkon ministrave zbatimin e kodit etik: Nuk ka udhëtime luksi e dhurata

Kryeministri Edi Rama mbajti mbledhjen e parë të qeverisë në mandatin e tretë, menjëherë pas betimit në Presidencë.

Vendimi i parë i qeverisë së re ishte ai lidhur me kodin etik të qeverisë, i cili sipas kryeministrit duhet të zbatohet nga çdo ministër apo zëvendës i tij.

Teksa theksoi faktin se kodi etik i qeverisë është në fuqi nga 2013 kryeministri u ndal në disa prej çështjeve që duhen zbatuar me përpikëri nga anëtarët e qeverisë, mes të cilave ndalimi i udhëtimeve në biznes klas, pushimet jashtë shtetit apo darkat dhe drekat kur janë në orar të punës nga ana e ministrave.

“Në kod duhet të shkruhet shprehimisht se një ministër nuk duhet të pranojë bileta udhëtimi për veten apo familjarët nga kompania private, dhe gjithashtu që nuk duhet të përdorin sallën VIP të aeroportit nëse nuk janë në udhëtim pune. E njëjta gjë vlen për veturat e anëtarëve të qeverisë në rrugë që duhet të zbatojnë rregullat e qarkullimit si gjithë qytetarët përveçse kur kanë ndonjë urgjencë. Po ashtu, ndalimi i përdorimit të makinave zyrtare për familjarë të ministrit”, tha kreu i qeverisë.

Gjithashtu, kreu i qeverisë theksoi se dhuratat që ministrat marrin gjatë udhëtimeve të punës do të inventarizohen në muzeun e kryeministrisë.

Kryeministri tha se çdo ministër që shkel kodin etik duhet të kërkojë ndjesë publike dhe në rast përsëritjeje duhet të largohet nga detyra. Kjo, tha ai, vlen edhe për të si kreu i qeverisë.