Nafta kontrabandë dyshohet shkak për aksidentin tragjik në Bullgari

Shkaku i aksidentit tragjik të ndodhur në Bullgari mund të jetë transporti kontrabandë i naftës. Gazeta bullgare “24 Orë”, raporton se hetuesit kanë këtë si pistë kryesore.

Hetuesit i kanë thënë gazetës bullgare se në autobus kishte karburant shtesë. Kjo dyshohet se është bërë shkak për shpërthim të menjëhershëm pasi autobus u përplas me trafik ndarësen.

Nafta shtesë besohet se po transportohej për qëllime përfitimi nisur nga diferenca në çmim. Nafta besohet se është blerë në Turqi me një diferencë prej 60 lekë për litër.

Në autobusin e “Besa Trans” gjendeshin 52 pasagjerë prej të cilëve 45 mbetën të vdekur. Autobusi është përfshirë nga flakët menjëherë pas aksidentit dhe pasagjerët e kanë pasur të pamundur të dalin pasi dera kishte prekur parmakun. Ky është aksidenti më tragjik në historinë e Bullgarisë.

Mes viktimave janë 12 fëmijë, dy prej të cilëve binjakë që u gjendën jetë të mbledhur nga nëna e tyre në përpjekje për t’i shpëtuar nga flakët.

Sipas hetuesve, drejtuesit e agjencisë së udhëtimit bënin kontrabandë të naftës për të ulur koston e udhëtimit. Përplasja fatale ka ndodhur vetëm 15 minuta pasi shoferi kishte ndaluar autobusin për një pushim në një pikë karburanti.

Personat që arritën të shpëtonin kanë mundur që të thyejnë xhamin nga krahu i djathtë dhe të dalin nga automjeti.

Shkak për përplasjen mendohet se është bërë shpërthimi i një gome pasi një copë e saj është gjetur disa metra para vendit ku ndodhi aksidenti.

Nga ana tjetër hetuesit thonë se ka prova që tregojnë se në autobus ka pasur naftë shtesë, vaj hidraulik dhe vaj transmisioni.

LEXONI GJITHASHTU:

• Humbi djalin në aksidentin me autobus, babai i mbijetuar rrëfen momentin dramatik