4 raste të reja, shkon në 18 numri i të prekurve tek 313. Spitali i burgut gati të kthehet në spital COVID

Shkon në 18 numri i të prekurve me coronavirus në paraburgimin 313 në kryeqytet. Gjatë përditësimit të situatës nga Ministria e Shëndetësisë u bë me dije se 4 rastet që janë konstatuar në Tiranë,  lidhen me vatrën në institucionin e vuajtjes së dënimit ‘Jordan Misja’.

Prej 2 ditësh të paraburgosurit që kanë rezultuar pozitiv janë izoluar në qelitë e regjimit të posaçëm 41 bis, që ka një kapacitet të kufizuar ndërsa burime nga sistemi penitenciar bëjnë më dije se spitali i burgut pritet të kthehet në një spital COVID.

Aty kanë nisur të transferohen të gjithë të paraburgosurit e prekur, pasi mund t’iu ofrohet një shërbim mjekësor i specializuar, megjithëse deri më tani asnjë prej tyre nuk raportohet në gjendje të rënduar shëndetësore.

Për autoritetet mbetet e paqartë se si u transmetua COVID-19 në paraburgimin 313, fillimisht tek italiani Giovani Dicosimo, në kushtet kur prej më shumë se 1 muaji janë ndërprerë takimet me familjarët.

Në IEVP-në ‘Jordan Misja’ janë 393 të paraburgosur ndërsa forcat operacionale të policisë së burgjeve kanë shtuar masat e sigurisë pas indinjatës së shfaqur nga të dënuarit kur u zbulua rasti i parë.