Pas një muaji pezullim, rihapen qindra biznese, por ende nuk ka shitje

Pas më shumë se një muaji, shqiptarët do të kenë mundësi të blejnë në dyqanet e veshjeve, aksesorëve dhe këpucëve. Këto kategori biznesesh janë lejuar nga qeveria që të hapin aktivitetin që prej ditës së hënë, por në kushte të shtuara higjeno-sanitare. 

Pronarët e këtyre bizneseve, tregojnë se i kanë zbatuar masat higjeno-sanitare të vendosura nga qeveria, në mënyrë që të rinisin aktivitetin e tyre.

Ata thonë se, kanë blerë maska dhe doreza si dhe bëjnë shpeshherë pastrimin e ambientit të dyqanit. Por, mbyllja e aktivitetit për një kohë të gjatë, ka sjellë vështirësi të shumta për këto kategori biznesesh. 

“Jemi prekur pasi malli ka ngelur stok. E kemi ndjerë këtë situatë normalisht si gjithë të tjerët”, tregon një pronare dyqani për shitjen e këpucëve.

Pronarët e dyqaneve optike, të cilat tashmë kanë një javë që kanë hapur bizneset, tregojnë se xhiroja e tyre ditore gjatë kësaj periudhe ka qenë shumë më e ulët se ajo e një dite normale. 

Mbeten për t’u hapur baret, restorantet, parukeritë, klinikat dentare, kinematë dhe palestrat. Sipas kryeministrit Rama, këto kategori biznesesh do të hapen në fazën e fundit, për shkak të rrezikut të përhapjes së coronavirusit.